Deputat: Çernobbio forumu Azərbaycanın mövqeyinin dünyaya çatdırılmasında növbəti platforma rolunu oynayıb
Bakı, 2 sentyabr, AZƏRTAC
Prezident İlham Əliyevin rəhbərliyi ilə Azərbaycan ötən müddətdə çox güclü və qüdrətli dövlətə, dünyada böyük nüfuz qazanmış və hörmətlə yanaşılan ölkəyə çevrilib. Azərbaycanın beynəlxalq aləmdə nüfuzu durmadan artmaqdadır. Dünyada baş verən hadisələr fonunda inkişaf etmiş ölkələrin rəhbərlərinin Azərbaycan Prezidenti ilə müxtəlif platformalarda keçirilən görüşləri, həmçinin Prezident İlham Əliyevin müxtəlif nüfuzlu beynəlxalq forumlara dəvət edilməsi ölkəmizin və dövlətimizin başçısının beynəlxalq nüfuzundan xəbər verir.
Bunu AZƏRTAC-a açıqlamasında Milli Məclisin deputatı Vüqar İskəndərov deyib.
O bildirib ki, Azərbaycan Prezidentinin sentyabrın 2-də İtaliyanın Çernobbio şəhərində işə başlayan “The European House - Ambrosetti” beyin mərkəzi tərəfindən “Dünya, Avropa və İtaliyaya baxış” və “Rəqabətli strategiyalar üçün bu günün və sabahın ssenarisi” mövzusunda 48-ci beynəlxalq Çernobbio Forumuna dəvət olunması da deyilənləri bir daha təsdiqləyir: “Qeyd etmək yerinə düşər ki, Azərbaycan Prezidenti İlham Əliyev İtaliya Prezidenti Sercio Mattarellanın, İtaliya Nazirlər Şurasının Sədri Mario Draqinin və “The European House - Ambrosetti” beyin mərkəzinin dəvəti ilə beynəlxalq forumda əsas qonaq qismində iştirak edib. Dövlətimizin başçısı forumun plenar iclasında “Enerji təhlükəsizliyinin təmin olunmasında Azərbaycanın rolu” mövzusunda çıxış edib”.
Deputatın sözlərinə görə, 1965-ci ildən fəaliyyət göstərən “The European House - Ambrosetti” İtaliyanın idarəetmə-məsləhət xidməti sahəsində aparıcı beyin mərkəzi hesab olunur: “Mərkəz Avropa və onun hüdudlarından kənarda ofislərə və geniş tərəfdaşlıq şəbəkəsinə malikdir. Dünyanın beyin mərkəzləri ilə bağlı aparıcı reytinqlərə əsasən İtaliyada birinci və Avropada ilk onluqda qərarlaşan “The European House - Ambrosetti” İtaliya və Avropa şirkətləri üçün əhəmiyyət daşıyan məsələlərin müzakirə olunduğu forumlar və müxtəlif tədbirlər təşkil edərək İtalyan şirkətlərinin qlobal tərəfdaşları ilə əlaqələrinin yaradılmasına və əməkdaşlığın təşviqinə xidmət edir. Bu beyin mərkəzi, eyni zamanda, İtaliya və Avropa üçün potensiala malik ölkələrlə əməkdaşlığın təşviqinə müsbət təsir etmək imkanı olan və ikitərəfli iqtisadi gündəmləri inkişaf etdirmək iqtidarında olan liderləri bir araya gətirərək yüksək səviyyəli müzakirə platformaları təqdim edir. Müxtəlif illərdə Çernobbio Forumunda dünyanın aparıcı ölkələrinin dövlət və hökumət başçıları, beynəlxalq təşkilatların rəhbərləri və digər nüfuzlu şəxslər iştirak ediblər. Bu dəfə isə Prezident İlham Əliyev bu beynəlxalq tədbirdə əsas qonaq qismində çıxış edib ki, bu da yuxarıda vurğulandığı kimi dövlətimizin başçısının beynəlxalq aləmdə böyük nüfuza malik olmasının daha bir sübutudur”.
Forumda bir sıra məsələlərin müzakirə edildiyini deyən V.İskəndərov bu sırada enerji məsələlərinin öndə olduğunu bildirib: “Bu da səbəbsiz deyil. Çünki bu gün Avropanın üzləşdiyi böhran vəziyyəti özünə alternativ mənbələr tapmağa sövq edir. Belə bir vəziyyətdə də sadiq tərəfdaş Azərbaycan bu dövlətlər üçün ən optimal variantdır. Yeri gəlmişkən, forumdakı çıxışında bu məqama toxunan Prezident İlham Əliyev deyib ki, artan enerji tələbatını ödəmək üçün bizim əlbəttə, sıx əməkdaşlığa və koordinasiyaya ehtiyacımız var. Dövlətimizin başçısı qeyd edib ki, biz bu məqsədlə Avropa İttifaqı ilə artıq rəsmi olaraq enerji sahəsində dialoqa başlamışıq. Bu dialoq təkcə təbii qaz deyil, enerji bazarının digər seqmentlərini, xüsusilə də elektrik enerjisi, hidrogen və yaşıl enerji seqmentlərini əhatə edir”.
Azərbaycan Prezidentinin forumdakı çıxışında diqqəti çəkən digər məqamın qaz təchizatı ilə bağlı olduğunu qeyd edən deputat deyib: “Prezident İlham Əliyev deyib ki, Ukrayna-Rusiya müharibəsi başlayandan sonra təbii qaz məsələsi Avropanın gündəliyində duran əsas məsələlərdən birinə çevrilib. Bir çox layihələr mövcuddur ki, bunlardan biri də tikintisi yekunlaşmaqda olan Yunanıstan-Bolqarıstan İnterkonnektorudur. Buna bənzər digər layihə İonik-Adriatik boru kəməridir. Bu kəmərlə Azərbaycan qazı üç Balkan ölkəsinə nəql ediləcək. Dövlətimizin başçısı bildirib ki, son dövrdə Azərbaycana 10-dan çox ölkədən - Gürcüstan, Türkiyə, İtaliya, Bolqarıstan və digərlərindən mövcud qaz təchizatının artırılması, ya da qaz təchizatına yeni qoşulma ilə bağlı rəsmi müraciətlər daxil olub”.
V.İskəndərov bildirib ki, dövlətimizin başçısının çıxışı təkcə enerji və qaz təchizatı ilə bağlı məqamlarla yadda qalmayıb: “Məsələn, forumun moderatorunun dünyada və regionda mövcud geosiyasi vəziyyətlə bağlı sualını cavablandıran dövlətimizin başçısı qeyd edib ki, Azərbaycan öz siyasətini milli maraqlar və beynəlxalq hüququn prinsipləri əsasında qurur. Bu kontekstdə Prezident İlham Əliyev xatırladıb ki, Azərbaycana qarşı beynəlxalq hüququn prinsipləri uzun illərdir pozulurdu. O, beynəlxalq hüququn qorumasına cavabdeh olan beynəlxalq institutların fəaliyyətinin cari çağırışlara uyğunlaşdırılmasının vacibliyini qeyd edib. Göründüyü kimi bu, olduqca vacib məqamlardır. Ümumiyyətlə, hesab edirəm ki, bu forum Azərbaycanın mövqeyinin dünyaya çatdırılmasında növbəti platforma rolunu oynayıb”.
Bölmənin digər xəbərləri
