Deputat: Müasir Azərbaycan sürətli inkişafı ilə bölgənin liderinə çevrilib
Bakı, 12 oktyabr, AZƏRTAC
Azərbaycan bugünkü inkişafı ilə siyasi, iqtisadi, hərbi, mədəni və digər istiqamətlər üzrə əldə etdiyi nəticələrə görə bölgədə və dünyada söz sahibi olan bir ölkəyə çevrilir, öncül siyahılarda yer alır. Bu nəticənin əldə olunmasında ölkəyə rəhbərlik edən dahi siyasətçinin, ümummilli lider Heydər Əliyevin yolunun layiqli davamçısı olan Prezident İlham Əliyevin gərgin əməyi, yorulmadan çalışması, uzaqgörən xarici və daxili siyasəti dayanır. Azərbaycan Prezidenti xalqına söykənərək, ona güvənərək ən çətin və həlli müşkül görünən problemləri qətiyyətlə, səbirlə, müdrik qərarları ilə birdəfəlik həll edir.
Bunu AZƏRTAC-a açıqlamasında Milli Məclisin deputatı Əminə Ağazadə bildirib.
Müasir Azərbaycanın yeni-yeni nailiyyətlər əldə edən, sürətli inkişafı ilə bölgənin liderinə çevrilən bir ölkə olduğunu vurğulayan deputat deyib: “Heydər Əliyev məktəbinin layiqli məzunu və davamçısı olan Prezident İlham Əliyev bütün təzyiqlərə, çətinliklərə, problemlərə qətiyyətlə sinə gərərək dövlət idarəetməsinin ən uğurlu modellərini tətbiq etməkdədir. Prezident İlham Əliyevin özünün də dediyi kimi, o, ata vəsiyyətini, ümummilli lider Heydər Əliyevin ən böyük arzusunu - Qarabağın mənfur düşmənlərdən, işğalçı ermənilərdən azad olunmasını gerçəkləşdirdi. Otuz ilə yaxındır ki, “Qordi düyünü”nə çevrilmiş Qarabağ problemini dahi siyasətçi İlham Əliyev müdrik və uzaqgörən siyasəti ilə uğurla apardığı Vətən müharibəsində - 44 günə həll etdi. Xalqımızın ən ağrılı və ən böyük problemi olan Qarabağ münaqişəsi Azərbaycan Ordusunun gücü ilə, Müzəffər Ali Baş Komandan İlham Əliyevin rəhbərliyi ilə Azərbaycanın xeyrinə başa çatdı. Siyasi, tarixi, ideoloji, elmi, ictimai fəaliyyətlə məşğul olan hər kəsə yaxşı məlumdur ki, dünyadakı silahlı münaqişələrin həlli prosesinin 50 il, hətta 100 il belə uzanma ehtimalı var. Uzun-uzadı nümunələr gətirmədən yaxın və uzaq qonşularımızı - Gürcüstanı, Moldovanı, Əfqanıstanı, Fələstini və sairlərini göstərə bilərik. Nəzərə alsaq ki, Qarabağ problemi böyük dövlətlərin, qlobal güclərin geosiyasi maraqlarının toqquşduğu bir məsələyə çevrilmişdi, o zaman onun həllinin nə qədər çətin olduğunu təsəvvür edə bilərik. Məhz geosiyasi prosesləri dəqiqliklə təhlil edən Prezident İlham Əliyevin müdrik qərarları nəticəsində Azərbaycan Ordusu 44 günə 30 illik problemi həll etdi. “Dəmir yumruq”la düşməni əzib məhv edən Ali Baş Komandan İlham Əliyev yeni reallıqlar yaratdı. Bu reallıq isə vaxtilə başqalarının diktəsi ilə hərəkət edən Azərbaycanın düşmənə diktə edən, digərləri ilə bərabərhüquqlu münasibətlər quran bir ölkəyə çevrilməsi idi. Bu reallıq erməni kilsəsinin, erməni diasporunun, radikal ermənilərin 100 illik planlarının, erməniçilik ideologiyasının darmadağın edilməsi idi. Bu reallıq Azərbaycanın savaşaraq öz torpaqlarını azad etməsi idi. Bu reallıq ümummilli lider Heydər Əliyevin vəsiyyətinin, Azərbaycan xalqının arzusunun gerçəkləşməsi idi. Bu reallığı yaradan dahi lider, görkəmli dövlət xadimi Prezident İlham Əliyev tarixdə öz adını və izini qoydu”.
Deputat qeyd edib ki, bir zamanlar Şuşada yallı gedib xalqımızı təhqir edənlər indi qorxularından, məhz Prezident İlham Əliyevin siyasətinin nəticəsində Azərbaycanla sərhədə yaxınlaşmağa belə cürət etmirlər.
“Qalib ədası ilə Azərbaycana qarşı təhdidlər səsləndirən Ermənistan vətəndaş müharibəsinin bir addımlığındadır. Kilsə bir söz deyir, hakimiyyət başqa söz deyir, müxalifət tamam fərqli mövqedən çıxış edir. Reallıq isə budur: əzilmiş və sındırılmış Ermənistan ordusu, əsgərini qoyub qaçmış generallar, oğullarını tapmaq üçün Prezident İlham Əliyevdən kömək uman erməni əsgər anaları, bölgədə və dünyada nüfuzu yerlə-yeksan olan Ermənistan, Rusiyaya yalvarmaqdan alçalmış duruma düşən erməni hərbi-siyasi rəhbərliyi, aclıq və səfalət içərisində olan, ümidsiz duruma düşmüş bədbəxt erməni xalqı. Azərbaycanda isə 50-dən çox siyasi partiya Prezident İlham Əliyevin siyasətini dəstəklədiyini birmənalı şəkildə bəyan etdi. Müharibənin gedişatında QHT-lər, media qurumları nəinki Prezident İlham Əliyevin siyasətini dəstəkləyirdi, hətta onun təbliği üçün əlindən gələni əsirgəmirdi. Bütün dövlət və ictimai qurumlar, bütün Azərbaycan xalqı birmənalı şəkildə Ali Baş Komandana, Ordumuza dəstək oldu. Əsl vətəndaş həmrəyliyi, dünyaya örnək ola biləcək xalq-ordu-prezident birliyi göstərildi. Bu da Prezident İlham Əliyevin illərlə həyata keçirdiyi uğurlu siyasətin, təməlləri möhkəm atılmış dövlətçilik siyasətinin bariz nümunəsi idi”, - deyə Əminə Ağazadə bildirib.
Bu gün Azərbaycanda bütün sahələrdə quruculuğun, inkişafın, uğurlu islahatların, yüksəlişin müşahidə olunduğunu diqqətə çatdıran deputat deyib: “Xalqımızın ən mühüm problemi - Qarabağ münaqişəsi tarixin arxivinə qovuşandan sonra Azərbaycan daha da sürətli inkişaf yoluna qədəm qoyub. Prezident İlham Əliyevin rəhbərliyi ilə işğaldan azad olunmuş ərazilərimizdə sürətli yenidənqurma və bərpa işləri həyata keçirilməkdədir. Otuz il ərzində xarabazara çevrilmiş torpaqlarımızda 30 günün içərisində canlanma müşahidə olunmaqdadır. Bu gedişat yaxın 3-5 il ərzində həmin yerlərin cənnətə çevrilməsilə nəticələnəcək. Ölkənin digər bölgələrində də eyni sürətlə quruculuq-abadlıq işləri həyata keçirilir. Prezidentin müntəzəm olaraq bölgələrə etdiyi səfərlərdə yeni obyektlər açılır, infrastruktur layihələri icra olunur. Elm və təhsilə, səhiyyəyə, hərbiyə, mədəniyyətə, sosial-iqtisadi məsələlərə, bir sözlə bütün sahələrə dövlət başçısının xüsusi diqqəti və qayğısı müşahidə olunur. İşinin çoxluğuna baxmayaraq hər bir sahə ilə, bəzən həmin sahədə söz sahibi olan insanlarla ayrı-ayrılıqda maraqlanır, problemlərinin həlli üçün qətiyyətli addımlar atır. Vətəndaş dövlətini, onun başçısını daim öz yanında görür, güvəndə olduğunu hiss edir. Beləliklə də gördüyü işlərlə, yorulmadan və davamlı şəkildə çalışması nəticəsində, müdrik qərar qəbul etməsi ilə İlham Əliyev xalqımızın ümid yerinə, uğur simvoluna, qurucu liderinə çevrilib”.
Bölmənin digər xəbərləri
