ELM VƏ TƏHSİL
Dilçilik İnstitutunun gənc alimləri mükafatlandırılıb
Bakı, 3 fevral, AZƏRTAC
AMEA-nın Nəsimi adına Dilçilik İnstitutunda Gənclər Günü münasibətilə tədbir keçirilib.
İnstitutdan AZƏRTAC-a bildirilib ki, tədbirdə çıxış edən elmi işlər üzrə direktor müavini dosent Baba Məhərrəmli 2 Fevralın Azərbaycan Gəncləri Günü kimi elan olunmasının Ulu Öndər Heydər Əliyevin adı ilə bağlı olduğunu vurğulayıb. O bildirib ki, Ulu Öndər Heydər Əliyev gənclərə göstərdiyi diqqət və qayğı ilə onların inkişafına mühüm töhfələr verib, Azərbaycanın gələcəyini formalaşdıran gənclər siyasətinin əsasını qoyub.
Dilçilik İnstitutunun Gənc Alim və Mütəxəssislər Şurasının sədri Arzu İsgəndərzadə isə bildirib ki, bu əlamətdar günün qeyd edilməsi Azərbaycanın gənclər siyasətindəki dönüş nöqtələrindən biridir. Vurğulanıb ki, Ümummilli Lider Heydər Əliyev tərəfindən 1997-ci il fevralın 1-də imzalanan Sərəncam gənclərin təhsilinə, elmin inkişafına və sosial aktivliyinə göstərilən dövlət dəstəyinin ən bariz nümunəsidir. Azərbaycan Milli Elmlər Akademiyası da ölkənin gənclər siyasətində mühüm rol oynayır və bu sahədə bir çox təşəbbüslər həyata keçirir. AMEA-nın gənclərlə bağlı siyasəti elmi inkişafı və intellektual potensialı artırmaq, eyni zamanda, gənc alimlərin və tədqiqatçıların dəstəklənməsi üzərində cəmlənir.
Professor Sayalı Sadıqova çıxışında gənclərin cəmiyyətin inkişafında mühüm rol oynadığını qeyd edib, onların hər birinin potensialını daha da inkişaf etdirməsi üçün geniş imkanların mövcud olduğunu vurğulayıb. Gəncləri elmi seminarlarda və konfranslarda daha fəal iştirak etməyə çağıran professor bildirib ki, elmi mühitdə aktivlik gənclərin şəxsi inkişafına böyük töhfələr verir və onları öz sahələrində lider olmağa təşviq edir.
Sonra Azərbaycan dialektologiyası şöbəsinin elmi işçisi Aynur Saydova yay məktəbində iştirakı ilə bağlı təcrübələrindən, baş kitabxanaçı Talehə Bakıxanova isə Türkiyənin İstanbul şəhərinə işgüzar səfərindən danışıb.
Sonda isə 11 nəfər gənc əməkdaş təşəkkürnamə ilə təltif edilib.
Bölmənin digər xəbərləri
