Dillər Universitetinin Konfutsi İnstitutunda Beynəlxalq Muzeylər Gününə həsr olunan tədbir keçirilib
Bakı, 31 may, AZƏRTAC
Azərbaycan Dillər Universitetinin (ADU) nəzdində fəaliyyət göstərən Konfutsi İnstitutu Beynəlxalq Muzeylər Gününə həsr olunmuş “Tarixin görünən üzləri - qədim muzeylər” adlı onlayn tədbir keçirib.
ADU-dan AZƏRTAC-a bildirilib ki, tədbirdə çıxış edən Konfutsi İnstitutunun direktoru Rafiq Abbasov çinşünas tələbələrə bu bayramın bir qayda olaraq xalqlar arasında mədəni mübadilə və əməkdaşlığın inkişafına kömək şüarı ilə keçirildiyini və bu əlamətdar günün qeyd olunduğu hər bir ölkədə ictimaiyyətin diqqətini mədəni irsə, muzeylərin vəziyyətinə, bu sahədə mövcud problemlərə cəlb etmək üçün vəsilə olduğunu deyib. O, Ulu Öndərin muzey işinin inkişafı üzrə müəyyən etdiyi prioritetlərin Prezident İlham Əliyev və birinci xanım Mehriban Əliyevanın rəhbərliyi ilə fəaliyyət göstərən Heydər Əliyev Fondu tərəfindən uğurla davam etdirildiyini tələbələrin diqqətinə çatdırıb.
Rafiq Abbasov, eyni zamanda, Azərbaycanın mədəniyyət paytaxtı Şuşada fəaliyyət göstərən tarix, dərman bitkiləri, xalça, daş sənətkarlığı muzeylərindən, eləcə də Üzeyir Hacıbəyli, Bülbül və Natəvanın ev-muzeylərindən bəhs edib. O, Azərbaycan və Çinin muzey tarixindən danışaraq, eramızdan əvvəl XIII-XII əsrlərdə Çində estetik dəyərə malik əşyaların, əsərlərin, sənədlərin saxlanıldığı məkanların müasir muzeylərin sələfləri hesab olunduğunu da vurğulayıb. Alim ümummilli lider Heydər Əliyevin və Azərbaycan Prezidenti İlham Əliyevin Çinə səfərləri zamanı bu ölkənin məşhur mədəniyyət abidələrini və tarixi muzeylərini ziyarət etdiklərini də bildirib.
Konfutsi İnstitutunun mütəxəssisi Nigar Qocayeva isə tələbələrə Ququn (Qadağan şəhər) imperator saray muzeyi haqqında məlumat verərək, onun təkcə ən gözəl qədim memarlıq abidələrindən biri deyil, həm də dünyada ən yaxşı saxlanılmış orta əsr saray ansamblı olduğunu və Pekinin mərkəzində yerləşdiyini qeyd edib. O, Ququnun nəhəng memarlıq abidələrinin və nadir sərvətlərinin Çinin parlaq mədəniyyətinin simvoluna çevrildiyini də vurğulayıb. Həmçinin ADU Çinşünas tələbələrinin UNESCO-nun Dünya İrsi Siyahısına daxil edilmiş Ququn muzeyinin direktoru Şan Disyan ilə “Qadağan edilmiş şəhərdə sülh” mövzusunda mühazirə oxuması ilə görüşlərindən də danışıb.
Bölmənin digər xəbərləri
