DİM sədri: Bu il tələbə adını qazananların sayı artıb
Bakı, 25 avqust, AZƏRTAC
Dövlət İmtahan Mərkəzinin (DİM) İdarə Heyətinin sədri Məleykə Abbaszadə tələbə adını qazanan abituriyentləri təbrik edib.
DİM-dən AZƏRTAC-a bildirilib ki, bu il tələbə adını qazananların sayı ötən ilin müvafiq göstəricisi ilə müqayisədə 1711 nəfər artıb. Dövlət sifarişi əsasında qəbul olunanların sayı da ötən illə müqayisədə 290 nəfər çoxdur. Son illərdə qəbul planında dövlət sifarişli yerlərin sayının artırılması nəticəsində ödənişsiz təhsil almaq imkanı əldə edən tələbələrin sayında artım müşahidə olunur.
M.Abbaszadə bildirib ki, qəbul olunanların siyahısında yer alan hər bir adın arxasında illərlə davam edən təhsil, məsuliyyət, gərgin zəhmət, ciddi hazırlıq və çətinliklərin dəf edilməsi dayanır. Onun sözlərinə görə, əldə olunan uğur, ilk növbədə, abituriyentlərin öz səylərinin, məqsədyönlü fəaliyyətlərinin və öz qüvvələrinə inamlarının nəticəsidir. Təbrikdə abituriyentlərin uğurunda valideynlərin, yaxınların və müəllimlərin də xüsusi rolu vurğulanıb. Bildirilib ki, tələbə adının qazanılması yalnız məzunların deyil, onların uğuruna inanaraq dəstək göstərən hər kəsin ortaq sevincidir. DİM-in qəbul prosesindəki fəaliyyətinə də toxunan İdarə Heyətinin sədri qeyd edib ki, Mərkəz yalnız imtahanların təşkilatçısı kimi deyil, həm də abituriyentlərə etibarlı informasiya, məsləhət və metodik dəstək təqdim edən qurum kimi fəaliyyət göstərib. Rəsmi materiallar, elmi-metodik vəsaitlər və test topluları, elektron xidmətlər, sınaq imtahanları, məsləhət mərkəzləri və açıq görüşlər abituriyentlərin imtahanlara səmərəli hazırlaşmasına, biliklərini obyektiv qiymətləndirməsinə və ixtisas seçimi ilə bağlı düzgün qərar verməsinə xidmət edib. Təbrik mesajında Prezident İlham Əliyevin təhsilin, elmin, biliyin və insan kapitalının inkişafının ölkənin davamlı inkişafında xüsusi əhəmiyyət daşıdığına dair fikirləri də qeyd olunub. Bildirilib ki, gənclərin qazandığı bilik, peşəkarlıq, təşəbbüskarlıq və məsuliyyət gələcəkdə Azərbaycan cəmiyyətinin və dövlətinin inkişafının mühüm hərəkətverici qüvvəsinə çevriləcək.
M.Abbaszadə yeni tələbələrə universitet illərində qarşılarına yüksək məqsədlər qoymağı, çətinliklər qarşısında ruhdan düşməməyi, daim öyrənməyi və valideynlərinin, müəllimlərinin dəstəyini qiymətləndirməyi tövsiyə edib.
“Bu gün həyatınızda yeni bir səhifə açılır. Hər birinizə öz potensialınızı üzə çıxarmağı, seçdiyiniz sahədə əsl peşəkar olmağı, əldə edəcəyiniz bilik və bacarıqları daim təkmilləşdirməyi tövsiyə edirəm”, – deyə DİM-in İdarə Heyətinin sədri vurğulayıb.
Bölmənin digər xəbərləri
