DİNİ QURUMLARLA İŞ ÜZRƏ DÖVLƏT KOMİTƏSİ BÜLLETENİNİN XÜSUSİ BURAXILIŞI ÇAPDAN ÇIXMIŞDIR
Bülleten Azərbaycan Respublikasının Prezidenti Heydər Əliyevin “Azərbaycan Respublikasının Dini Qurumlarla İş üzrə Dövlət Komitəsinin yaradılması haqqında” 2001-ci il 21 iyun tarixli Fərmanı və ümummilli liderimiz Heydər Əliyevin və Azərbaycan Prezidenti İlham Əliyevin din və milli-mənəvi dəyərlər haqqında fikirləri ilə açılır.
Komitənin sədri Rafiq Əliyevin bülletendə dərc olunmuş “Heydər Əliyev və dini-mənəvi dəyərlər” sərlövhəli məqaləsində cəmiyyətimizin mənəvi dayaqlarının möhkəmlənməsində, milli mədəniyyətin humanist potensialının qorunub saxlanmasında Azərbaycan xalqının ümummilli liderinin gördüyü işlərdən ətraflı danışılır.
Bu nömrədə oxucular dinin və mənəviyyatın mahiyyəti barədə yazılarla, 2003-cü ilin yanvarından etibarən respublikanın dini icmalarının rəhbərləri və təmsilçiləri üçün keçirilən elmi-praktik seminarların işi ilə tanış olacaqlar. Azərbaycandakı müxtəlif dinlərin tarixi ilə maraqlananlar üçün təhlili məqalə təklif olunur, son illər dünyanın Azərabycanda olmuş görkəmli din xadimləri və dinə həsr edilmiş beynəlxalq forumlar barədə də məlumat verilir.
“Dini təhsil haqqında” və “Dini maarifçilik nəyə, lazımdır” mövzusunda yazılar dini təhsil almaq istəyənlər üçün maraqlı olacaqdır.
