Diplomatik korpusun nümayəndələrinə Azərbaycanda aparılan sosial islahatlar barədə məlumatlar verilib YENİLƏNİB VİDEO
Bakı, 28 mart, AZƏRTAC
Martın 28-də Azərbaycan Respublikası Prezidenti Administrasiyasının dəstəyi, Xarici İşlər Nazirliyi və Əmək və Əhalinin Sosial Müdafiəsi Nazirliyinin birgə təşkilatçılığı ilə xarici ölkələrin Azərbaycandakı səfirləri, müvəqqəti işlər vəkilləri və diplomatik korpus nümayəndələri ilə “Azərbaycan Respublikasında sosial islahatlar” mövzusunda görüş keçirilib. Görüşdə beynəlxalq qurumların ölkəmizdəki nümayəndəliklərinin rəhbər şəxsləri də iştirak edib.
AZƏRTAC xəbər verir ki, əmək və əhalinin sosial müdafiəsi naziri Sahil Babayev Prezident İlham Əliyevin sosial islahatlar proqramının milli əmək, məşğulluq, sosial müdafiə sisteminin güclənməsinə və əhatə dairəsinin genişlənməsinə imkan verdiyini söyləyib.
O, dövlət başçısının 2018-ci il 9 avqust tarixli Fərmanı əsasında Əmək və Əhalinin Sosial Müdafiəsi Nazirliyinin tabeliyində Dayanıqlı və Operativ Sosial Təminat Agentliyi (DOST Agentliyi) və “DOST” mərkəzlərinin yaradılması istiqamətində aparılan işlərdən danışarkən qeyd edib ki, Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban xanım Əliyevanın təşəbbüsü olan DOST layihəsi məşğulluq, əmək, sosial müdafiə və təminat sahələrində xidmətlərin innovativ həllərin tətbiqi üzərində, “bir pəncərə”, həmçinin operativlik, şəffaflıq, nəzakətlilik, məsuliyyət və rahatlıq prinsipləri əsasında təqdim edilməsinə, vətəndaş məmnunluğunun artırılmasına şərait yaradır.
Nazir, həmçinin ölkə başçısının 2018-ci il 5 sentyabr tarixli Fərmanı ilə ölkədə ilk sosial reyestr olan “e-sosial” internet portalının, “Məşğulluq” sisteminin və 18 alt sistemdən ibarət Mərkəzləşdirilmiş Elektron İnformasiya Sisteminin yaradıldığını bildirib və həmin yeniliklər barədə dolğun məlumat verib. O, bu ilin əvvəlindən ölkəmizin sosial təminat sahəsində ilk proaktiv xidmət olan avtomatlaşdırılmış pensiya təyinatına başlandığını, 2018-ci il iyulun 1-i tarixinə fərdi hesabında pensiya kapitalı qeydə alınan şəxslərə 2006-cı ilin yanvarın 1-dək 25 il sosial sığorta stajının avtomatik olaraq hesablandığını, sosial təminat sisteminin digər komponentlərinin də avtomatlaşdırılması işlərinin aparıldığını deyib.
S.Babayev Prezident İlham Əliyevin sosial islahatlar paketinin tərkib hissəsi kimi təkcə bu il imzalanan fərman və sərəncamların təqribən 3 milyona yaxın vətəndaşı əhatə edərək, onların rifahında müsbət dəyişikliklərə imkan yaratdığını qeyd edib. Nazir bildirib ki, imzalanan həmin sənədlər sosial sahədə inqilabi xarakter daşıyan əhəmiyyətli irəliləyişlərə səbəb olub. Minimum əməkhaqqının və minimum pensiyanın məbləği təxminən 40 faiz, 14 kateqoriya üzrə sosial müavinətlər və 7 kateqoriya üzrə Prezident təqaüdləri orta hesabla 100 faiz artırılıb. Minimum pensiya artımından sonra ölkəmiz MDB-də alıcılıq qabiliyyəti indeksi üzrə Qazaxıstanla ilk yeri bölüşür.
Nazir indiyədək 7645 vərəsənin şəhid ailələrinə verilən birdəfəlik ödəmələrlə təmin olunduğunu, şəhid ailələri və müharibə əlillərinin mənzillərlə, müharibə əlillərinin avtomobillərlə təminatı sahəsində işlərin ildən-ilə gücləndiyini vurğulayıb, həmin sahələrdə atılan mühüm addımları, eləcə də problemli kreditlərin həlli və sosial müdafiəyönümlü digər mühüm tədbirləri diqqətə çatdırıb.
S.Babayev əhalinin məşğulluq imkanlarının artırılması, özünüməşğulluq proqramının və ödənişli ictimai işlərin genişləndirilməsi, qeyri-rəsmi məşğulluğun qarşısının alınması, layiqli əməyin təminatı və s. istiqamətlərdə aparılan işlər, ölkəmizin yeni Məşğulluq Strategiyası və onun 2030-cu ilədək olan dövr üzrə prioritetləri barədə məlumat verib. Sosial müdafiə tədbirlərinin gücləndirilməsi ilə bərabər, nazirlik yanında Dövlət Sosial Müdafiə Fondunun gəlirlərinin artımını ifadə edən göstəricilər, əlilliyin qiymətləndirilməsi və reabilitasiya sisteminin, əmək qanunvericiliyinə dövlət nəzarətinin təkmilləşdirilməsi sahələrində aparılan islahatlar, beynəlxalq qurumlarla birgə icra olunan layihələr qeyd olunub.
Əmək və əhalinin sosial müdafiəsi nazirinin müavini Anar Kərimov və DOST Agentliyinin İdarə Heyətinin sədri Fərid Məmmədov təqdimatlarla çıxış ediblər.
Görüş iştirakçılarının əmək, məşğulluq, sosial müdafiə sahələrində aparılan islahatlar barədə suallarına cavablar verilib.
Bölmənin digər xəbərləri
