DÖVLƏT İDARƏÇİLİK AKADEMİYASINDA MƏTBUAT KONFRANSI KEÇİRİLMİŞDİR

08.10.2005 [22:03]
Çap et
A⁺ A^-

AZƏRTAC xəbər verir ki, oktyabrın 8-də Azərbaycan Respublikasının Prezidenti yanında Dövlət İdarəçilik Akademiyasında bu ali məktəblə İsveçrə İnkişaf və Əməkdaşlıq Təşkilatının (SDC) Cənubi Qafqaz üzrə əlaqələndirici ofisi və Cenevrə Beynəlxalq Tədqiqatlar İnstitutunun dövlət orqanlarında çalışan gənc məmurlar üçün “Beynəlxalq əməkdaşlığın inkişaf etdirilməsi” layihəsi çərçivəsində birgə təşkil etdikləri “Beynəlxalq ticarət siyasəti və Dünya Ticarət təşkilatı” mövzusunda təlim kurslarının yekunlarına həsr olunmuş mətbuat konfransı keçirilmişdir.

Kurslarda Azərbaycanın və Gürcüstanın Xarici İşlər, Milli Təhlükəsizlik, İqtisadi İnkişaf, Kənd Təsərrüfatı nazirliklərində, Milli Bank və digər təşkilatlarında işləyən mütəxəssislər iştirak etmişlər.

DİA-nın prorektoru Əlikram Abdullayev bu ali məktəbdə idarəçilik sahəsində yüksək ixtisaslı kadrlar hazırlamaq üçün həyata keçirilən tədbirlərdən danışmışdır.

Cenevrə Beynəlxalq Tədqiqatlar İnstitutunun prorektoru, layihənin rəhbəri Daniel Vorner Cənubi Qafqaz üzrə 1997-ci ildən indiyədək həyata keçirilən layihələrdən bəhs etmişdir.

Qeyd olunmuşdur ki, bu layihələrdən məqsəd beynəlxalq iqtisadiyyat və ticarət əlaqələrinin genişləndirilməsi üçün mütəxəssislərin inkişafına kömək göstərməkdir.

Konfransda D.Vorner jurnalistləri maraqlandıran suallara da cavab vermişdir.