DÖVLƏT QADIN SİYASƏTİ UĞURLA HƏYATA KEÇİRİLİR
AZƏRTAC xəbər verir ki, sentyabrın 5-də Azərbaycan qadınlarının III qurultayına hazırlıq çərçivəsində Əzizbəyov rayonu qadınlarının konfransı keçirilmişdir.
Rayon icra hakimiyyəti başçısının müavini Əli Heydərov Azərbaycanda dövlət qadın siyasətinin uğurla həyata keçirildiyini bildirmiş, qadınların ölkənin ictimai həyatında fəal iştirak etdiklərini diqqətə çatdırmışdır.
Konfransda rayon təşkilatının hesabatı dinlənilmişdir. Hesabatda göstərilmişdir ki, rayon əhalisinin 62 min 587 nəfəri qadındır. İqtisadiyyatın müxtəlif sahələrində məşğul olan qadınların sayı 19 min 350 nəfərdir. Məruzədə 48 qadının dövlət qulluğunda, 73 nəfərin rəhbər vəzifələrdə çalışdığı, 70 qadının isə sahibkarlıqla məşğul olduğu bildirilmişdir.
Tədbirdə məruzə ətrafında çıxışlar olmuşdur.
Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova ümummilli lider Heydər Əliyev tərəfindən ölkəmizdə qadın siyasəti və gender bərabərliyinin formalaşdığını və onların hüquqlarının qorunması istiqamətində ciddi işlərin görüldüyünü bildirmişdir.
Konfransda Azərbaycan qadınlarının III qurultayına nümayəndələr seçilmiş, Ağbirçəklər Şurası yaradılmışdır.
Bölmənin digər xəbərləri
