Eden Mamut: Azərbaycanda insanların intellektual düşüncəsi, dünyaya baxışı əsaslı surətdə dəyişmişdir
Bakı, 5 oktyabr (AZƏRTAC). Bakıya hər gəlişimizdə çox böyük dəyişikliklərin şahidi oluruq. Bu dəyişikliklər özünü təkcə yeni binalar və xarici gözəllikdə deyil, insanların intellektual səviyyəsində də göstərir.
AZƏRTAC xəbər verir ki, bu sözləri Qara Dəniz Hövzəsi Universitetləri Şəbəkəsinin müdiri, Rumıniyadan gəlmiş professor Eden Mamut demişdir.
E. Mamut bildirmişdir ki, müasir dünyada insanların düşüncə tərzi auditoriya ilə virtual universitet arasındakı münasibətlərə uyğun olaraq dəyişir. Azərbaycan dövləti, hökuməti və buna müvafiq olaraq gəncliyi də bu proseslərdən nəinki kənar qalmamış, eyni zamanda, onların fəal iştirakçısına çevrilmişdir. Bakıda ikinci dəfə Beynəlxalq Humanitar Forumun təşkili, çoxlu sayda elm adamlarının, siyasətçilərin bu tədbirə maraq göstərməsi dediklərimin əyani sübutudur. Azərbaycanda insanların intellektual düşüncəsi, dünyaya baxışı əsaslı surətdə dəyişmişdir. Bu, bizi çox sevindirir.
Bölmənin digər xəbərləri
