ƏDLİYYƏ NAZİRLİYİNDƏ QƏBUL
Martın 28-də ədliyyə naziri Fikrət Məmmədov ATƏT-in Bakıdakı nümayəndəliyinin yeni təyin edilmiş başçısı cənab Piter Burxardı onun xahişi ilə qəbul etmişdir.
Qonağa ölkəmizdəki fəaliyyətində uğurlar arzulayan ədliyyə naziri dünya birliyinə və demokratik təsisatlara inteqrasiya yolunu tutmuş dövlətimizin nüfuzlu beynəlxalq təşkilatlarla, o cümlədən ATƏT-lə sıx əlaqələrindən danışmış, bu mötəbər təşkilatla əməkdaşlığa böyük əhəmiyyət verildiyini qeyd etmişdir.
Görüşdə möhtərəm Prezidentimiz cənab Heydər Əliyevin rəhbərliyi ilə qısa müddət ərzində aparılan demokratik, o cümlədən məhkəmə-hüquq islahatı, insan hüquqlarının daha etibarlı müdafiəsinə xidmət edən yeni qanunlar, penitensiar sistemdə həyata keçirilən mütərəqqi tədbirlər barədə qonağa ətraflı məlumat verilmiş, Ədliyyə Nazirliyi tərəfindən ATƏT-in nümayəndələrinin iştirakı ilə məhkumların hüquqlarının təmin olunması üzrə cəzaçəkmə müəssisələrində analoqu olmayan seminarların keçirilməsi xatırlanaraq hərtərəfli əməkdaşlığın davam etdirilməsinin əhəmiyyəti vurğulanmışdır.
Səmimi qəbula görə minnətdarlığını bildirən qonaq Azərbaycanda məhkəmə-hüquq, o cümlədən penitensiar sistemin islahatının müsbət nəticələrini qeyd etmiş, qanunvericiliyin təkmiləşdirilərək beynəlxalq standartlara uyğunlaşdırılmasında Azərbaycanın nailiyyətlərini vurğulamış, ATƏT-in ölkəmizə yardımçı olmağa və əməkdaşlığı genişləndirməyə hazır olduğunu bildirmişdir.
Maraqlı fikir mübadiləsi şəraitində keçən görüşdə konkret məsələlər üzrə faydalı əməkdaşlığın perspektivləri müzarkirə olunmuşdur.
Bölmənin digər xəbərləri
