EKOLOJİ CƏHƏTDƏN DAVAMLI İNKİŞAF İDEYASINI GÖRKƏMLİ SİYASƏTÇİLƏR VƏ BİZNESMENLƏR TƏBLİĞ EDƏCƏKLƏR
Bakı, 10 avqust (AZƏRTAC). BMT-nin Baş katibi Pan Gi Mun qlobal davamlı inkişafın təbliği üçün yüksək səviyyəli nümayəndələrdən ibarət qrup yaradıldığını bildirmişdir. Qrupun həmsədrləri Finlandiya Prezidenti Tarya Halonen və Cənubi Afrika Respublikasının Prezidenti Ceykob Zuma olacaqdır.
Qrupa məşhur siyasətçilər, analitiklər, biznesmenlər, vətəndaş cəmiyyətinin nümayəndələri daxildir. Onların vəzifəsi planetdə yoxsulluğun aradan qaldırılması yollarını axtarmaq və eyni zamanda, insanın inkişafının birbaşa asılı olduğu iqlimin və təbii sistemlərin qorunub saxlanmasını təmin etmək olacaqdır.
BMT-nin Baş katibi bildirmişdir ki, istixana qazlarının atmosferə buraxılmasının qarşısını almaq lazımdır. Eyni zamanda, iqlim dəyişikliklərinin təsirinə uyğunlaşma üçün tədbirlər də görülməlidir.
O demişdir: “Biz qarşılıqlı surətdə əlaqəli qlobal problemlə olan yoxsulluq, aclıq, susuzluq və enerji təhlükəsizliyi məsələlərinin həlli ilə məşğul olmalıyıq”. Hamı üçün daha sabit gələcəyin təməlini qoymaq zəruridir.
BMT-nin Baş katibi ümidvar olduğunu bildirmişdir ki, yeni qrup qlobal miqyasda düşünəcək və ekoloji cəhətdən təmiz davamlı inkişaf ideyasının həyata keçirilməsinin institusional və maliyyə mexanizmi ilə bağlı suallara praktik cavablar tapacaqdır.
Qrup 2011-ci ilin sonunda fəaliyyətinin nəticələri barədə məruzə təqdim edəcəkdir.
Bölmənin digər xəbərləri
