Elçin Eminov: Azərbaycanın uşu-sandaçıları beynəlxalq arenada güclü rəqib hesab olunurlar
Bakı, 16 iyun, AZƏRTAC
Mükafatlardan ibarət kolleksiyamda İslam Həmrəyliyi Oyunlarında qazandığım medalların xüsusi yeri var. 2013-cü ildə İndoneziyada təşkil olunan III İslam Həmrəyliyi Oyunlarında bürünc medal qazandım. Qarşıma məqsəd qoydum ki, Bakıda təşkil olunan IV İslam Həmrəyliyi Oyunlarında da mükafatçılar sırasında yer alım. Əsas hədəfimə - çempionluğa nail ola bilməsəm də, İslamiadanın gümüş medalını qazandım.
Bu sözləri AZƏRTAC-a məxsusi müsahibəsində uşu-sanda idman növü üzrə üçqat Avropa çempionu, gənclərdən ibarət millimizin və “Arktika” klubunun baş məşqçisi Elçin Eminov deyib.
E.Eminov bildirib: “Ölkəmizin yüksək səviyyədə ev sahibliyi etdiyi “Bakı-2017”də gümüş medal qazandığım üçün çox şadam. Sevindirici haldır ki, çıxışımı Azərbaycan Prezidenti İlham Əliyev də izləyirdi. Əslində, bu, dövlətimizin başçısının idmançılara diqqət və qayğısının bariz nümunəsidir. Hazırda əsas hədəfim 2021-ci ildə İstanbulda təşkil olunacaq V İslam Həmrəyliyi Oyunlarında qızıl medal qazanmaqdır. IV İslam Həmrəyliyi Oyunlarından sonra ölkəmizdə uşu-sanda idman növü daha da populyarlaşdı. Bunu ölkə çempionatında iştirakçıların sayından və idmanın bu növü ilə məşğul olmaq istəyənlərin müraciətlərindən açıq-aydın görmək mümkündür”.
İdmançı kimi məşqlərə Binəqədidəki 182 nömrəli orta məktəbin idman zalında başlayan E.Eminov deyib: “İlk məşqçim Vəli Əhmədov olub. İdmana çox böyük həvəsim var idi. Həmin vaxtlar televiziyada idman yarışlarını izləyirdim və bu, məni daha da ruhlandırırdı. Gərgin məşqlərdən sonra ilk uğurumu 2003-cü ildə Gürcüstanda qazandım və Avrasiya çempionatında üçüncü oldum. Qazandığım bu nailiyyət yeni uğurlarım üçün təkan oldu. Əsas hədəfim beynəlxalq arenada Azərbaycanın üçrəngli bayrağını dalğalandırmaq və himnini səsləndirmək idi. Mütəmadi olaraq beynəlxalq turnirlərə qatıldım və mükafatçılar sırasında yer aldım”.
Uşu-sanda idman növü ilə 2007-ci ildən məşğul olmağa başladığını vurğulayan idmançı qeyd edib ki, əlbəyaxa döyüş növlərində uşu-sanda ən çətin, lakin baxımlı idman növüdür. Dəfələrlə ölkə çempionatının qalibi oldum. Ardıcıl dörd il Azərbaycanda təşkil olunan Avrasiya çempionatında fəxri kürsünün ən yüksək pilləsinə qalxdım. Mənim üçün qürurverici haldır ki, üç dəfə Avropa çempionatında ölkəmizin himnini səsləndirmişəm. Bu nailiyyətlərim mənə qələbə ilə yanaşı, qürur hissi də yaşatdı. İdmançı kimi formalaşmağımda Azərbaycan Uşu-sanda Federasiyasının prezidenti Azər Həsənsoy və şəxsi məşqçim Fərid Mayılovun əməyi böyükdür.
İdmançı olmaqla yanaşı, həm də gənclərdən ibarət uşu-sanda üzrə Azərbaycan millisini çalışdıran E.Eminov yetirmələri arasında yetərincə titullu idmançıların olduğunu vurğulayıb. Qeyd edib ki, onlardan Amin Əlilli Avropa kubokunun qalibi, Fətəli İsmayılov döyüş növləri üzrə dünya birinciliyinin qızıl medalçısı, Rasim Kərimov Avropa çempionatının qalibi olub. Məşqçi ümidvar olduğunu bildirib ki, onlar gələcəkdə irimiqyaslı yarışlarda da uğurla çıxış edib ölkəmizi layiqincə təmsil edəcəklər.
Cari ildə təşkil olunan uşu-sanda üzrə ölkə çempionatında baş məşqçisi olduğu “Arktika” klubunun yeniyetmələr arasında birinci olduğunu bildirən E.Eminov deyib ki, bu, bizim düzgün yolda olmağımızdan xəbər verir. O, mayın əvvəlində Moskvada uşu-sanda üzrə Avropa çempionatında tələbələri Ayxan Məmmədzadənin gümüş, Nihat Məlikovun isə bürünc medal qazandıqlarını xüsusi qeyd edib.
“Azərbaycan Prezidenti İlham Əliyev 2017-ci ildə yüksək nailiyyətlər göstərmiş bir qrup idmançıya və idman mütəxəssisinə yeni mənzillərin orderlərini təqdim etmişdi. Onların arasında mən də var idim. Dövlətimizin başçısı idmançıların sosial vəziyyətinin yaxşılaşdırılmasına həmişə xüsusi diqqət yetirir. Bu, bizi yeni uğurlara və qələbələrə həvəsləndirir”, - deyə məşqçi bildirib.
Hazırda gələn il keçiriləcək dünya çempionatına hazırlaşdığını və əsas məqsədinin çempionluq olduğunu vurğulayan E.Eminov deyib: “Dünyada Çin, İran və Rusiya idmançıları həmişə uğurları ilə seçilirlər. Azərbaycanın uşu-sanda idmançıları beynəlxalq arenada güclü rəqib hesab olunurlar. İdmanın bu növündə əsasən Asiya ölkələrindən olan idmançılar güclüdürlər. Çox şadam ki, Bakıda təşkil olunan IV İslam Həmrəyliyi Oyunlarında dünya çempionu olan indoneziyalı və qırğızıstanlı rəqiblərimi mübarizədən kənarlaşdıra bilmişəm”.
Bölmənin digər xəbərləri
