Elektrik enerjisinin beşdəbir hissəsi bərpa olunan mənbələr hesabınadır
Bakı, 16 may, AZƏRTAC
Hazırda elektrik enerjisinin ümumi həcminin 20 faizi bərpa olunan mənbələrdən alınır. “Yaşıl iqtisadiyyat”a keçid təkcə iqlim dəyişmələrinin qarşısını almır, sağlamlıq üçün riskləri azaltmır, eyni zamanda, iqtisadi fayda gətirir. AZƏRTAC BMT-nin Xəbərlər Mərkəzinə istinadla xəbər verir ki, bu fikri BMT-nin baş katibi Antoniu Quterreş Avstriyada beynəlxalq forumda çıxışında səsləndirib.
O deyib: “Mürəkkəb və narahat dünyamızda hər gün müxtəlif problemlərlə üzləşməli oluram. Lakin bu problemlərdən heç biri iqlim dəyişmələri ilə müqayisəyə gəlmir. Əgər iqlim dəyişmələrinin öhdəsindən gəlməsək, qalan problemlər artmağa davam edəcək və sonunda hamımızın axırına çıxacaq”.
Baş katib xəbərdarlıq edib ki, yalnız parnik qazları emissiyalarının azaldılması istiqamətində fəaliyyəti genişləndirməklə, inkişaf etməkdə olan ölkələrdə adaptasiya tədbirlərini maliyyələşdirməklə, kömür və nefti “təmiz” enerji ilə əvəzləməklə bu təhlükədən yaxa qurtarmaq olar.
BMT-nin baş katibi xəbərdarlıq edib ki, iqlim dəyişmələri bəşəriyyətə və bütövlükdə Yer kürəsində həyata ekzistensial təhlükədir. O bildirib ki, fikrini yaxınlaşmaqda olan böhrandan çıxmağın indinin özündə mövcud olan yollarını tapmaq üzərində cəmləşdirməyə üstünlük verir.
Baş katibin sözlərinə görə, bu, ilk növbədə, az məsrəfli olmuş “təmiz” enerjiyə keçiddir. Dünya miqyasında elektrik enerjisinin beşdəbir hissəsi bərpa olunan mənbələr hesabınadır.
Mərakeşdə sahəsi Paris boyda olan günəş enerjisi mərkəzi inşa edilir. Mərkəz 2020-ci ilə kimi bir milyondan çox evi enerji ilə təchiz edəcək.
Çin günəş fotoelektrik enerjisinin həcminə dair məqsədini ötən ilin iyulunda yerinə yetirib, halbuki həmin məqsədə yalnız 2020-ci il üçün müvəffəq olmaq niyyətində idi.
Fransada karbohidrogen ehtiyatlarının kəşfiyyatına və hasilatına son qoyan qanun qəbul edilib.
Proqnozlara görə, 2021-ci il üçün ABŞ-da onlarca kömür şaxtası bağlanacaq, enerji hasilatının 69 faizi bərpa olunan mənbələrin payına düşəcək.
Aparıcı sığorta şirkətlərindən biri - “Allianz” ötən həftə elan edib ki, daha kömür şaxtalarını və kömürlə işləyən elektrik stansiyalarını sığorta etməyəcək.
Baş katib sonda deyib: “Bu gün bizə elektrik enerjisi sahəsində inqilab lazımdır”. O, mövcud məlumatlara istinad edərək bildirib ki, ötən il bərpa olunan enerji mənbələrinə yatırılan sərmayələrin həcmi 242 milyard dollar təşkil edib ki, bu da qazıntı şəklində yanacağın hasilatı üzrə yeni müəssisələrə yatırılan sərmayədən yarıbayarı çoxdur. Amma bu, yetərli deyil.
Bölmənin digər xəbərləri
