Macarıstanda sənaye müəssisəsində partlayış olub, iki nəfər ölüb
Budapeşt, 26 avqust, AZƏRTAC
Macarıstanın Mohac şəhərində sənaye müəssisəsinin ağac materiallarının saxlandığı sahəsində baş verən partlayış nəticəsində iki işçi həyatını itirib.
AZƏRTAC xəbər verir ki, ilkin məlumata görə, yanacaq təchizatı sisteminin yaxınlığında toz halında olan ağac materialının partlaması nəticəsində təxminən 15 metr hündürlüyündə alov yaranıb. Hadisə zamanı alovun qarşısında olan üç işçi ağır, həyati təhlükəli xəsarətlər alıb. Onlardan ikisi xəstəxanaya çatdırıldıqdan sonra dünyasını dəyişib. Üçüncü işçinin həyatını xilas etmək üçün həkimlər mübarizəni davam etdirirlər.
Hadisə yerinə Mohac və Vemend şəhərlərinin peşəkar yanğınsöndürənləri cəlb olunub. Yanğınsöndürənlər ərazini termal kameralarla yoxlayıb, avadanlığın üzərindəki dam örtüyünün bir hissəsini sökərək közərən və tüstülənən sahələri tam söndürüblər. Yanğının istehsalat binasına və orada saxlanılan ağac qırıntılarına keçməsinin qarşısı alınıb. Təhlükəsizlik məqsədilə bina boşaldılıb.
Polis idarəsi hadisə ilə bağlı araşdırma aparır. Fakt üzrə ölümə səbəb olan, peşə fəaliyyəti çərçivəsində ehtiyatsız təhlükəyə məruz qoyma şübhəsi ilə cinayət işi başlanıb. Hadisənin dəqiq səbəblərinin müəyyənləşdirilməsi üçün ekspertlər və əməyin mühafizəsi üzrə aidiyyəti qurumlar istintaqa cəlb edilib.
Bölmənin digər xəbərləri
