Solist: Laçında ifa etdiyimiz hər mahnı Böyük Qayıdışın, dönüş sevincinin ifadəsidir
Laçın, 26 avqust, AZƏRTAC
Laçında, doğma Qarabağ torpağında səhnəyə çıxmaq hər bir sənətçi üçün böyük qürur və məsuliyyətdir. Laçın Şəhəri Günü münasibətilə keçirilən konsert proqramında ifa etdiyimiz hər mahnı təkcə musiqi deyil, həm də Zəfərin, Böyük Qayıdışın və doğma yurda dönüş sevincinin ifadəsidir.
Bunu AZƏRTAC-a açıqlamasında Müslüm Maqomayev adına Azərbaycan Dövlət Akademik Filarmoniyasının solisti, beynəlxalq və respublika müsabiqələrinin laureatı Nurlana Abdullayeva deyib.
“Laçının yenidən öz sakinlərini, qonaqlarını musiqi ilə qarşılaması qəlbimizi sevinc hissi ilə doldurur. Bu torpaqlarda sənətimizi təqdim etmək həm böyük xoşbəxtlik, həm də dövlətimizin qazandığı tarixi Zəfərin bəxş etdiyi ən dəyərli hisslərdən biridir”, - deyə o qeyd edib.
Nurlana Abdullayeva vurğulayıb ki, şəhərdə belə tədbirlərin keçirilməsi mədəni irsin yaşadılması, milli musiqimizin təbliği və insanların doğma yurdda zəngin mədəni mühitdə bir araya gəlməsi baxımından xüsusi əhəmiyyət kəsb edir.
Müxbir - Gülay Nəzərova
Bölmənin digər xəbərləri
