Böyük Qayıdış proqramı Azərbaycanın regional inkişaf siyasətində yeni mərhələ yaradıb – ŞƏRH
Bakı, 24 sentyabr, AZƏRTAC
Regionların sosial-iqtisadi inkişafına dair dövlət proqramlarının ardıcıl şəkildə həyata keçirilməsi Azərbaycanın dayanıqlı və hərtərəfli inkişafının təmin olunmasında mühüm əhəmiyyət daşıyır. Bu proqramlar çərçivəsində ötən dövr ərzində bölgələrdə genişmiqyaslı infrastruktur layihələri reallaşdırılıb, yeni müəssisələr yaradılıb, məşğulluq imkanları genişləndirilib və əhalinin sosial rifahının yaxşılaşdırılması istiqamətində mühüm addımlar atılıb.
Bu fikirləri AZƏRTAC-a açıqlamasında Milli Məclisin deputatı Arzu Nağıyev bildirib.
Deputat qeyd edib ki, regionların inkişafı dövlət siyasətinin əsas istiqamətlərindən biri kimi daim diqqət mərkəzində saxlanılıb. Dövlət proqramlarının icrası nəticəsində şəhər və rayonlarda yol-nəqliyyat infrastrukturunun yenilənməsi, elektrik enerjisi, qaz, içməli su və digər kommunal xidmətlərin yaxşılaşdırılması ilə bağlı mühüm layihələr həyata keçirilib. Bu işlər bölgələrdə insanların gündəlik həyat şəraitinin yaxşılaşmasına və iqtisadi fəallığın artmasına imkan yaradıb.
Arzu Nağıyevin sözlərinə görə, regionların iqtisadi potensialının üzə çıxarılması və yerli resurslardan səmərəli istifadə olunması istiqamətində də əhəmiyyətli nəticələr əldə edilib. Sənaye müəssisələrinin, aqroparkların, kənd təsərrüfatı və emal sahələrinin yaradılması bölgələrdə istehsal imkanlarını genişləndirib. Eyni zamanda, sahibkarlara göstərilən dövlət dəstəyi yeni biznes layihələrinin həyata keçirilməsinə və əlavə iş yerlərinin açılmasına şərait yaradıb.
Deputat vurğulayıb ki, regionların sosial-iqtisadi inkişafı yalnız iqtisadi göstəricilərlə ölçülmür. Son illərdə bölgələrdə təhsil, səhiyyə, mədəniyyət və idman infrastrukturlarının yenilənməsi, yeni sosial obyektlərin istifadəyə verilməsi də əhalinin rifahının yüksəldilməsinə mühüm töhfə verib. Xüsusilə ucqar yaşayış məntəqələrində infrastrukturun yaxşılaşdırılması sosial xidmətlərin əlçatanlığının artırılması baxımından əhəmiyyətlidir.
“Regionların inkişafı ilə bağlı həyata keçirilən dövlət proqramları ölkənin iqtisadi potensialının daha geniş coğrafiyada reallaşdırılmasına imkan verib. Bu siyasət həm paytaxtla regionlar arasında inkişaf fərqinin azaldılmasına, həm də bölgələrdə yaşayan insanların öz doğma yerlərində məşğulluq və sahibkarlıq imkanlarının genişləndirilməsinə xidmət edir”, - deyə Arzu Nağıyev bildirib.
Onun sözlərinə görə, işğaldan azad edilmiş ərazilərin bərpası və Böyük Qayıdış proqramının həyata keçirilməsi də Azərbaycanın regional inkişaf siyasətində yeni mərhələ yaradıb. Qarabağ və Şərqi Zəngəzurda müasir şəhər və kəndlərin salınması, nəqliyyat və kommunal infrastrukturun qurulması, iqtisadi fəaliyyətin bərpası ölkənin gələcək inkişafında mühüm rol oynayacaq.
Deputat qeyd edib ki, bundan sonrakı mərhələdə regionların investisiya cəlbediciliyinin artırılması, innovativ texnologiyaların tətbiqi, qeyri-neft sektorunun inkişaf etdirilməsi, kənd təsərrüfatında məhsuldarlığın yüksəldilməsi və turizm potensialından daha səmərəli istifadə əsas prioritetlər sırasında olacaq.
Arzu Nağıyev əlavə edib ki, bütün bu tədbirlər Azərbaycanın regionlarının iqtisadi imkanlarının genişləndirilməsi ilə yanaşı, əhalinin sosial rifahının daha da yüksəldilməsinə və ölkənin uzunmüddətli, dayanıqlı inkişafının təmin olunmasına xidmət edir.
Bölmənin digər xəbərləri
