ABŞ naziri İrandan beynəlxalq aviareyslərin 80 faizinin bağlandığını iddia edib
Bakı, 24 sentyabr, AZƏRTAC
ABŞ maliyyə naziri Skott Bessent bildirib ki, Amerika sanksiyalarının İranın beynəlxalq hava yolları əməliyyatlarını sıxışdırmağa davam etdiyi bir vaxtda Nyu-Yorkda keçirilən BMT Baş Assambleyasında iştirak edən iranlı rəsmilərin vətənə necə qayıdacağı məsələsi həll olunmalıdır.
AZƏRTAC xarici mediaya istinadla xəbər verir ki, Bessent bildirib: “İqtisadi təcrid əməliyyatı” baxımından biz iranlıları bu gün heç vaxt görmədikləri kimi sıxışdırırıq”.
O, kampaniyanın İranın beynəlxalq hava əlaqələrinə təsir etdiyini bildirib. Nazir iddia edib ki, İrandan gələn beynəlxalq uçuşların 80 faizinə qədəri bağlanıb.
Bessent İranı dəstəkləyən maliyyə qurumlarına, şirkətlərə və digər müəssisələrə Vaşinqtonun onların əməliyyatlarını və bank hesablarını hədəf alacağı barədə xəbərdarlıq da edib: “Biz bunu bütün dünyaya çox aydın şəkildə bildirmişik; istər maliyyəçilər, istər bizneslə məşğul olanlar, istərsə də iranlıları təmin edən insanlar olsun. Biz sizin kim olduğunuzu bilirik, siz də kim olduğunuzu bilirsiniz”.
O, ABŞ strategiyasını hərbi əməliyyatlar, dəniz blokadası və maliyyə təzyiqinin vəhdəti kimi təsvir edib: “Beləliklə, altı həftəlik kinetik fəaliyyətimiz oldu. Blokada davam edir. İndi isə onlara maliyyə oksigenini məhdudlaşdırmaq və kəsmək baxımından əvvəllər görünməmiş təzyiq göstəririk”.
ABŞ rəsmisi Vaşinqtonun təzyiq kampaniyasının həftələr və ya aylar davam edə biləcəyini deyib. Bessent, həmçinin ABŞ-nin ilin əvvəlində İranla razılığa gəlməyə çalışdığını, lakin Tehranın sonradan Hörmüz boğazında hücumları artırmasının bu dialoqa zərbə vurduğunu qeyd edib. “Əgər razılaşma olarsa, sizə zəmanət verirəm ki, onlar buna sadiq qalacaqlar”, - deyə o bildirib.
Vaşinqton avqust ayında İranı iqtisadi cəhətdən təcrid etmək və Tehrana ABŞ sanksiyalarından yayınmağa kömək edən şirkətləri, maliyyə qurumlarını və digər donorları hədəf almaq üçün geniş kampaniya başladıb. ABŞ Maliyyə Nazirliyi o vaxtdan bəri İran aviasiya şəbəkələrini, maliyyə qurumlarını və kriptovalyuta ilə əlaqəli infrastrukturu hədəf almaq məqsədilə səylərini artırıb.
Bölmənin digər xəbərləri
