Elmar Babanlı: Gənc cüdoçular arasında Azərbaycan birinciliyində gərgin idman mübarizəsinin şahidi olduq
Bakı, 28 fevral, Leyla Qurbanova, AZƏRTAC
Gənc cüdoçular arasında Azərbaycan birinciliyi yüksək rəqabət şəraitində davam edir. Ümumiyyətlə hər çəki dərəcəsində çempionluğa iddialı gənclər olduğu üçün medallar uğrunda gərgin idman mübarizəsinin şahidi olduq.
Bu sözləri Azərbaycan Cüdo Federasiyasının baş katibi Elmar Babanlı AZƏRTAC-a məxsusi müsahibəsində deyib.
Azərbaycan çempionatlarının açıq turnir formatında təşkil olunduğunu vurğulayan E.Babanlı qeyd edib: “Məqsədimiz, ilk növbədə, xarici ölkələrdə yaşayan azərbaycanlı cüdoçuların milli çempionatda iştirakını təmin etməkdir. Bu cüdoçular yüksək nəticə göstərdikdə onlara ölkəmizin adından beynəlxalq yarışlarda çıxış etmələrinə şərait yaradırıq. Dörd ildir bu təcrübədən faydalanırıq. Millinin tərkibində əcnəbi idmançılardan seçilmiş cüdoçularımız mübarizə aparırlar”.
Baş katib qeyd edib ki, gənclər arasında cüdo üzrə yüksək nəticələrin əldə olunması uşaqlar və yeniyetmələr arasında idmanın bu növünün inkişafının diqqət mərkəzində olduğunu göstərir. O, fevralın ortalarında İspaniyanın Fuengirola şəhərində yeniyetmə cüdoçular arasında keçirilən Avropa kuboku turnirində Azərbaycan cüdoçularının 1 qızıl, 2 gümüş, 1 bürünc medal qazandıqlarını vurğulayıb.
E.Babanlı Azərbaycan birinciliyində iştirak edən gənclər arasında böyüklərdən ibarət yığmanın tərkibində Tokio Olimpiadasının lisenziyası uğrunda mübarizə aparan cüdoçuların olduğunu vurğulayaraq deyib: “Gənclərdən ibarət komandamızda güclü cüdoçular yer alıblar. Təsadüfi deyil ki, artıq böyüklərdən ibarət yığma komandada bütün çəki dərəcələrində böyük rəqabət var. Ən ağır çəki dərəcəsində millimizin üzvü Uşangi Kokauri beynəlxalq arenada bir sıra uğurlar qazanıb. Amma ağır çəkili digər idmançımız Şahin Qəhrəmanov iki il ölkə çempionatında onu məğlub edib. İstər yüngül, istər orta, istərsə də ağır çəkidə rəqabətin yüksək olması gənclər arasında güclü idmançıların yetişməsinin nümunəsidir. 100 kiloqram çəki dərəcəsində Elmar Qasımov, Zelim Kotsoyev və çəki dərəcəsini dəyişmiş digər gənc idmançılar güclü rəqiblərdir. 90 kiloqram çəki dərəcəsində Məmmədəli Mehdiyev lider mövqeyində öz yerini möhkəmləndirib. Onunla rəqabət aparan Tural Səfquliyevin də güclü potensialı var. Bundan başqa, 81 kiloqram çəki dərəcəsində beynəlxalq yarışlarda yüksək nailiyyətlər olmasa da, bu çəki dərəcəsində də yüksək rəqabət var. Bu, onu göstərir ki, bu çəki dərəcəsində inkişaf var və tezliklə nailiyyətlər olacaq.
Bu il cüdo təqviminin zəngin olduğunu bildirən E.Babanlı ötən həftə istedadlı tatami ustalarımızın Almaniyanın Düsseldorf şəhərində “Böyük dəbilqə” turnirində nailiyyətlərindən də danışıb. Qeyd edib ki, bu uğurların davamlı olması üçün komandaların hazırlıq prosesləri yüksək səviyyədə davam edir: “Ötən həftə başa çatan Düsseldorf “Böyük dəbilqə” turnirində Məmmədəli Mehdiyev (90 kq) bütün döyüşləri qələbə ilə başa vuraraq fəxri kürsünün birinci pilləsinə qalxıb. Üç bürünc medalı isə komandamızın aktivinə Rüstəm Orucov (73 kq), Zelim Kotsoyev (100 kq) və qadınlar arasında İrina Kindzerska (+78 kq) yazdırıblar. Əlbəttə, bu nailiyyətlərin davamlı olması üçün böyüklərin hazırlığı ilə yanaşı, yeniyetmə və gənc cüdoçulardan ibarət komandalara da federasiya tərəfindən böyük diqqət yetirilir.
Komandalarımızın hazırlıq prosesi davam edir. Tatami ustalarımızın fiziki, texniki, taktiki və psixoloji hazırlıq keçmələri üçün Azərbaycan Cüdo Federasiyası hər cür şərait yaradıb. Tokio Olimpiadasına lisenziya yarışları keçirilir və Azərbaycan idmançılarının həmin yarışlarda geniş heyətlə iştirakı təmin olunur. Cüdoçularımızın “Tokio 2020”yə doğru inamla irəlilədiklərini demək olar. Əminik ki, cüdo üzrə nailiyyətlər davamlı olacaq”.
Bölmənin digər xəbərləri
