ƏMƏKDAŞLIĞIN DAHA DA GENİŞLƏNDİRİLMƏSİ ÜÇÜN HƏR CÜR ŞƏRAİT VARDIR
Nazirliyin mətbuat mərkəzindən AZƏRTAC-a bildirmişlər ki, nazir Elmar Məmmədyarov səfiri yeni təyinatı münasibətilə təbrik edərək, Azərbaycan və Bolqarıstan arasında mövcud olan hərtərəfli və sıx əməkdaşlığın gələcəkdə də davam edəcəyinə ümidvar olduğunu bildirmişdir.
Azərbaycanda səfir kimi fəaliyyət göstərəcəyindən şərəf duyduğunu söyləyən İvan Palcev, iki ölkə arasında əlaqələrin daha da genişlənməsi, əməkdaşlığın bütün sahələrdə uğurla aparılması üçün mövcud olan bütün imkanlardan istifadə edəcəyini vurğulamışdır.
Görüşdə həmçinin Bolqarıstan Prezidenti Georgi Pırvanovun yaxın zamanlarda Azərbaycana planlaşdırılan rəsmi səfərinin hazırlıq işlərinə dair fikir mübadiləsi aparılmış və bildirilmişdir ki, bu səfər zamanı iki ölkə arasında bir çox, o cümlədən siyasi, iqtisadi, tibbi, ticarət və digər sahələrdə birgə sazişlərin imzalanması nəzərdə tutulur.
Bolqarıstan Prezidentinin ölkəmizə səfərinin uğurlu olacağına əmin olduğunu bildirən xarici işlər naziri Azərbaycanın ən vacib problemlərindən biri – Ermənistan-Azərbaycan, Dağlıq Qarabağ münaqişəsinin həllində Bolqarıstanın ölkəmizi dəstəkləməsini və Azərbaycanın ərazi bütövlüyünü tanıdığını həmişə bəyan etməsinə görə təşəkkürünü bildirmiş və ölkələrimiz arasındakı siyasi əlaqələrin beynəlxalq təşkilatlar çərçivəsində də genişlənəcəyinə ümid etdiyini diqqətə çatdırmışdır.
Görüşün sonunda Elmar Məmmədyarov səfirin etimadnaməsinin surətini qəbul edərək, Azərbaycanda gələcək fəaliyyətində ona uğurlar arzulamışdır.
Bölmənin digər xəbərləri
