ƏMƏKDAŞLIQ HAQQINDA PROTOKOL İMZALANMIŞDIR
Aprelin 22-də M.F.Axundov adına Dövlət Kitabxanasında Azərbaycan Respublikasının və Rusiya Federasiyasının mədəniyyət nazirlikləri arasında 2002-2003-cü illərdə əməkdaşlıq protokolu imzalanmışdır. Protokolu Azərbaycanın mədəniyyət naziri Polad Bülbüloğlu və Rusiya Federasiyasının mədəniyyət naziri Mixail Şvıdkoy imzaladılar.
Polad Bülbüloğlu imzalanma mərasimindən sonra keçirilmiş mətbuat konfransında bildirdi ki, 2001-ci ilin yanvarında Rusiya Prezidenti Vladimir Putinin Bakıya rəsmi səfərindən və bu ilin yanvarında Azərbaycan Prezidenti Heydər Əliyevin Moskvaya dövlət səfərindən sonra ölkələrimiz arasında münasibətlər bütün sahələrdə, o cümlədən humanitar sahədə yeni, keyfiyyətçə daha yüksək səviyyəyə qalxmışdır.
Rusiyanın mədəniyyət naziri Mixail Şvıdkoy ölkələrimizin mədəniyyət sahəsində əməkdaşlığının inkişafında protokolun əhəmiyyətindən danışaraq vurğuladı ki, teatr kollektivlərinin, müxtəlif ifaçıların qastrollarının təşkili, ali təhsil müəssisələri tələbələrinin mübadiləsi, sərgilərin keçirilməsi bu sahədə qarşılıqlı əlaqələrin əsas istiqamətləridir. Protokolda bildirilir ki, Rusiyada Azərbaycan mədəniyyəti günləri 2003-cü ildə keçiriləcəkdir. Mixail Şvıdkoy dedi ki, Rusiya tərəfi ölkənin ali rəssamlıq məktəblərinə daxil olmaq istəyən azərbaycanlı abituriyentlər üçün yerlərin sayını artırmaq niyyətindədir.
Bölmənin digər xəbərləri
