ƏMLAK MƏSƏLƏLƏRİ DÖVLƏT KOMİTƏSİNDƏ 20 YANVAR ŞƏHİDLƏRİNİN ƏZİZ XATİRƏSİ EHTİRAMLA ANILMIŞDIR
Bakı, 19 yanvar (AZƏRTAC). Əmlak Məsələləri Dövlət Komitəsində (ƏMDK) 20 Yanvar faciəsinin 20-ci ildönümü ilə əlaqədar anma mərasimi keçirilmişdir.
Mərasim iştirakçıları keçmiş sovet qoşunlarının vəhşicəsinə qətlə yetirdiyi şəhidlərin əziz xatirəsini bir dəqiqəlik sükutla yad etmişlər.
20 Yanvarın Azərbaycanın azadlıq mübarizəsi tarixində şanlı səhifələrindən biri olduğunu xatırladan komitə sədri Kərəm Həsənov 20 il əvvəl müstəqillik və suverenlik uğrunda istiqlal mübarizəsinə qalxmış xalqımızın başına gətirilən faciədən danışmışdır. Bildirilmişdir ki, qanlı şənbə günü bizim təkcə faciə günümüz deyil, həm də tariximizin şanlı səhifəsidir, Azərbaycanın milli azadlıq hərəkatının yüksəliş günüdür, 20 Yanvar özümüzü bir millət kimi tanıdığımız və dərk etdiyimiz gündür. 1990-cı il yanvarın 19-dan 20-nə keçən gecə qəhrəman oğul və qızlarımız sovet imperiyasının mürtəce siyasətinin qurbanı olmuş, sovet ordusunun müasir silahlarla silahlanmış qoşunlarının təcavüzünə məruz qalmışlar. Həmin gün yaddaşlara sovet-kommunist rejiminin Azərbaycan xalqının milli azadlıq hərəkatını qan içində boğmaq üçün ölkəmizə qarşı hərbi təcavüz etdiyi, günahsız insanların qətlə yetirildiyi bir gün kimi həkk olunmuşdur. O müdhiş gecə 137 mülki şəxs qətlə yetirilmiş, 744 nəfər yaralanmış, 841 nəfər qanunsuz həbs olunmuşdur. Sovet qoşunları 200 mənzil və evi, 80 avtomaşını, o cümlədən təcili yardım maşınlarını, külli miqdarda şəxsi və dövlət əmlakını məhv etmişlər. Öldürülənlər arasında beş millətin nümayəndəsi, 20-dən çox qadın və uşaq var idi.
Komitə sədri vurğulamışdır ki, bütün ömrü boyu xalqının yanında olan ulu öndərimiz Heydər Əliyev ailəsi ilə birgə Azərbaycanın Moskvadakı daimi nümayəndəliyinə gələrək, Qanlı Yanvar qırğınını törədənləri pisləyən kəskin bəyanatla çıxış etdi, xalqımızın başına gətirilən müsibəti dünyaya çatdırdı. Yalnız Azərbaycan xalqının ümummilli lideri Heydər Əliyevin ölkə rəhbərliyinə qayıdışından sonra, 1994-cü ildə 20 Yanvar hadisələrinə siyasi-hüquqi qiymət verildi və cinayəti törədənlərin adları ictimaiyyətə açıqlandı.
Azərbaycan Prezidenti İlham Əliyev tərəfindən 1990-cı il yanvar ayında faciəli hadisələr zamanı ölkəmizin azadlığı, suverenliyi uğrunda həlak olanların əziz xatirəsi daim yad edilir. Dövlətimizin başçısı şəhid ailələrinin sosial müdafiəsini gücləndirmək və onlara dövlət qayğısını artırmaq məqsədilə fərman imzalamışdır. Prezident İlham Əliyevin Sərəncamı ilə Şəhidlər xiyabanında əsaslı yenidənqurma və təmir işləri də aparılmışdır.
Çıxış edənlər bildirmişlər ki, bütün dəhşətləri ilə yanaşı, 20 Yanvar günü xalqımızın milli suverenlik, azadlıq uğrunda yenilməz iradəsinin rəmzidir. Faciə xalqımızın milli azadlıq uğrunda məbarizəsinin şanlı səhifəsidir. Təpədən-dırnağadək silahlanmış imperiya ordusunun cəza tədbirləri millətimizin haqq səsini boğa bilmədi. Yumruq kimi birləşən xalqımız öz etirazını, nifrətini daha ucadan bəyan etdi.
Natiqlər 20 Yanvar hadisələri və xalqımızın başına gətirilmiş faciələr haqqında həqiqətlərin dünya ictimaiyyətinə çatdırılmasında ulu öndər Heydər Əliyevin böyük xidmətlərini xüsusi vurğulamışlar. Qeyd olunmuşdur ki, Azərbaycan xalqı 20 Yanvar şəhidlərinin xatirəsini daim əziz tutacaq, onların fədakarlıqları xalqımızın yaddaşından heç zaman silinməyəcəkdir.
Bölmənin digər xəbərləri
