ƏN QƏDDAR QIZLAR MACARISTANDA YAŞAYIR
Məlum olmuşdur ki, ən qəddar qızlar Macarıstanda, ən rəhmsiz oğlanlar Çexiyada, ən sakit oğlan və qızlar isə Finlandiyada yaşayırlar.
Yeniyetmələrin (11-15 yaş) davakarlıq dərəcəsi məktəbyaşlı uşaqların davranışının ənənəvi surətdə öyrənilməsi çərçivəsində müəyyən edilmişdir. Belə təqiqatların nəticələrini DST hər dörd ildən bir açıqlayır. Bu dəfə alimlər 35 ölkədə 161 min məktəblinin davranışını öyrənmişlər.
Sosioloqlar müəyyən etmişlər ki, ötən il macar qızların 32 faizi və çex oğlanların 69 faizi, heç olmasa, bir dəfə kiminləsə dalaşmışdır. Buna görə də hər iki ölkə yeniyetmə qəddarlığının ən yüksək əmsalını almışdır. Estoniya, Litva və Belçika qızlar arasında, Litva, Latviya və İsrail oğlanlar arasında təcavüzkarlıq əmsalı çox yüksək olan beş dövlət sırasına daxil edilmişdir.
Finlandiya ən dinc yeniyetmələr ölkəsi adlandırılmışdır. 2005-ci ildə burada qızların cəmi 13 faizi və oğlanların 37 faizi dalaşmışlar.
Tədqiqatın müəlliflərindən biri, Edinburq Universitetinin professoru Kandeys Karri demişdir ki, inkişaf etmiş müxtəlif ölkələrdən olan yeniyetmələrin davranışında belə fərqin səbəbləri hələlik müəyyən edilməmişdir. Alimləri Finlandiyada yeniyetmələr arasında qəddarlığın rekord səviyyədə aşağı olması xüsusilə təəccübləndirir.
Bölmənin digər xəbərləri
