ENERGETİKLƏR NASAZLIĞI DƏRHAL ARADAN QALDIRMIŞLAR
“Azərenerji”nin mətbuat xidmətindən AZƏRTAC-a bildirmişlər ki, Varvara SES-də 3 nömrəli hidroaqreqatın əsaslı təmiri başa çatdırılmışdır. Hazırda həyata keçirilən işəsalma-sazlama işlərindən sonra aqreqat istifadəyə veriləcək və 5,5 MVt-lıq tam gücü ilə işləyəcəkdir. Ümumilikdə, bu SES-də üç belə aqreqat vardır.
Varvara SES-in gücünün az olmasına baxmayaraq, onun etibarlı və fasiləsiz işləməsinə böyük əhəmiyyət verilir. Belə ki, bu stansiya dəryaçada və ümumiyyətlə, Kür çayında suyun səviyyəsinin, bir növ, tənzimləyicisi rolunu oynayır.
Bu günlərdə Mingəçevir SES-də 1 nömrəli blok operativ surətdə təmir olunmuşdur. Dispetçerlər aqreqatın istehsal gücünün aşağı düşdüyünü aşkara çıxardıqdan sonra onun yoxlanması üçün işçi qrupu yaradılmışdır. Qrup soyutma sistemindəki nasazlığı üç gün ərzində aradan qaldırmış və blok yenidən tam gücü ilə işləməyə başlamışdır.
Bu SES-dəki 3 nömrəli aqreqatda aparılan bərpa işlərini də 2004-cü ildə başa çatdırmaq nəzərdə tutulmuşdur.
Bölmənin digər xəbərləri
