Əsirlərimizin qaytarılması Prezident İlham Əliyevin hərbçilərə verdiyi dəyərin göstəricisidir ŞƏRH
Bakı, 13 dekabr, AZƏRTAC
Bir neçə gün əvvəl əldə olunmuş razılaşma əsasında bu gün Azərbaycan və Ermənistan arasında əsirlərin dəyişdirilməsi baş tutdu, 32 erməni əsirin qarşılığında 2 azərbaycanlı hərbi qulluqçu əsirlikdən azad edildi. Bu, Azərbaycanın siyasi rəhbərliyinin, xüsusilə də Ali Baş Komandanın gücünün, humanizm prinsiplərinə verdiyi dəyərin göstəricisidir.
Bu sözləri politoloq Ramiz Alıyev azərbaycanlı hərbi qulluqçuların və erməni hərbçilərin əsirlikdən azad olunmasını AZƏRTAC-a şərh edərkən bildirib.
Onun sözlərinə görə, Müzəffər Ali Baş Komandan Azərbaycan Ordusunun hər bir üzvünün təhlükəsizliyinin qarantı olduğunu bir daha sübut etdi. O qeyd edib: “Dekabrın 7-də Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində humanizm prinsipinə sadiqlik ruhunda, xoş niyyət göstəricisi olaraq iki ölkə arasında qarşılıqlı etimad tədbiri kimi hərbçilərin azad edilməsi barədə razılıq əldə olunub. Yeni il ərəfəsində 32 erməni hərbçisinin yaxınları, həm də bizim əsgərlərin doğmaları sevindilər, ailələrdə sevinc, şadyanalıq yaşandı. Qeyd edim ki, azərbaycanlı hərbi qulluqçular yollarını azaraq Ermənistan tərəfə keçmişdilər və onların hər hansı hərbi pozuculuq, kəşfiyyat niyyəti olmayıb. Təəssüflər olsun ki, Ermənistan tərəfi əsgərlərimizi prosedura uyğun olaraq Azərbaycana qaytarmaq əvəzinə siyasi şou düzəltdi və onlara qondarma cinayət işi açaraq ağır cəza verdi. Azərbaycan dövləti isə bu halla razılaşa bilməzdi. Bütün hallarda 2 Azərbaycan əsgərinə qarşı 32 erməni hərbçinin azad edilməsi hərbi qulluqçumuza verilən dəyərin göstəricisidir. Bütün dünya Azərbaycanın öz vətəndaşlarının azadlığına, təhlükəsizliyinə necə həssas yanaşdığını gördü. Biz xalq olaraq bu addımı, qərarı alqışlamalıyıq. Ölkə liderinin bu addımı çox təqdirəlayiq hadisədir. Dünyanın aparıcı media orqanları Prezident İlham Əliyevin bu qərarından, 2 azərbaycanlı əsirə qarşı 32 erməni əsirin dəyişdirilməsindən yazır. Burada digər mühüm məqam üçüncü tərəfin iştirakı olmadan Azərbaycan və Ermənistanın öz aralarında vacib məsələlərlə bağlı razılıq əldə etmək üçün siyasi iradəyə malik olmalarıdır. Biz bunu sərhədlərin delimitasiya və demarkasiyası üzrə komissiyaların şərti sərhəddə görüşündə və eləcə də əsirlərin dəyişdirilməsində gördük. Deməli vasitəçilər olmadan da tərəflər görüşə, razılığa gələ bilirlər. Bu, eyni zamanda, Qarabağ məsələsindən, Azərbaycan-Ermənistan münasibətlərindən istifadə edərək öz siyasətini regiona yeritmək, burada qarışıqlıq salmaq istəyən güclərə mesajdır. Özünü vasitəçi adlandıranlar, əslində isə regionda vəziyyəti daha da gərginləşdirən güclər gördülər ki, Azərbaycan və Ermənistan kənar qüvvələrin iştirakı olmadan da razılığa gələ bilirlər”.
Azərbaycana qarşı Qərb tərəfindən olunan təzyiqlərin heç bir nəticə vermədiyini diqqətə çatdıran R.Alıyev əlavə edib: “Azərbaycan dövləti qətiyyət sərgiləyərək öz mövqeyini ortaya qoydu və bir daha göstərdi ki, heç kəs bizimlə təzyiq dilində danışa bilməz. Hətta ABŞ Dövlət katibinin Avropa və Avrasiya məsələləri üzrə köməkçisi Ceyms O’Brayn bölgəyə səfər edərək daha öncə buraxılan səhvləri yoluna qoymağa çalışdı. Azərbaycan tərəfi haqlı olaraq Ermənistana və Qərbə təklif etdi ki, sülh danışıqları vasitəçi olmadan iki ölkə arasında aparılsın. Həm əsirlərin dəyişdirilməsi, həm də BMT-nin iqlim dəyişikliklərinə dair COP29 sammitinin Azərbaycanda keçirilnməsinə dair Ermənistanla razılıq əldə olundu. Hər iki qərar, ilk növbədə, etimad mühitinin yaradılmasına hesablanıb. Bu da gələcəkdə Ermənistanın sülh prosesində daha ədalətli mövqe sərgiləyəcəyinə inamı artırır”.
Bölmənin digər xəbərləri
