Əsirlik və girovluqdan azad olunmuş şəxslər və ailələri də psixoloji dəstəklə əhatə olunub
Bakı, 2 fevral, AZƏRTAC
Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin postmüharibə dövrü üzrə psixoloji dəstək tədbirləri əsirlik və girovluqdan azad edilərək Vətənə qaytarılan şəxsləri də əhatə edib.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, agentliyin psixoloq və psixiatrlarından ibarət mütəxəssis qrupları həmin kateqoriyadan olan 14 şəxs və onların ailələri ilə psixo-sosial reabilitasiya işləri aparıblar. Bu işlər, o cümlədən psixokorreksiya tədbirləri həm əyani, həm onlayn şəkildə həyata keçirilib.
Görüşlər zamanı ailələrin sosial vəziyyətləri də öyrənilib, ehtiyaclarına uyğun dəstəklə təmin edilmələri üçün işlər görülüb.
Xatırladaq ki, Sosial Xidmətlər Agentliyi tərəfindən postmüharibə dövrü üçün psixoloji dəstək tədbirlərindən biri kimi, ötən ilin noyabr ayında psixoloji dəstək xətti (050 406 75 85) də yaradılıb. Müharibədən zərərçəkənlərə bu xətt vasitəsilə də (həmçinin zənglə əlaqədar evlərə gedilməklə) onlayn psixoloji dəstək göstərilib.
Bölmənin digər xəbərləri
