ETALONLARIN ƏLDƏ EDİLMƏSİ VƏ RESPUBLİKANIN ETALON BAZASININ MÖHKƏMLƏNDİRİLMƏSİ İSTİQAMƏTİNDƏ TƏDBİRLƏR DAVAM EDİR
AZƏRTAC xəbər verir ki, bu fikir Azərbaycan Respublikasının Standartlaşdırma, Metrologiya və Patent üzrə Dövlət Agentliyinin baş direktoru Ramiz Həsənovun iyunun 20-də Yeni Azərbaycan Partiyasının mərkəzi qərargahında keçirdiyi mətbuat konfransında səslənmişdir. Baş direktor rəhbərlik etdiyi qurumun fəaliyyət istiqamətləri - standartlaşdırma, metrologiya, uyğunluğun qiymətləndirilməsi, akkreditasiya, əqli mülkiyyətin bir qismi olan patentlər və əmtəə nişanları barədə danışmış, funksiyalarından söz açmışdır. Qeyd etmişdir ki, keçmiş sovet sistemindən miras qalmış ГОСТ sistemi hazırda beynəlxalq aləmdə bu sahədə mövcud olan tələblərə uyğun gəlmir və bəzi hallarda ziddiyyət təşkil edir. Bununla əlaqədar, agentlik tərəfindən öz səlahiyyətləri çərçivəsində islahatlara başlanmışdır. İslahatların əsas məqsədi Avropa İttifaqının, digər beynəlxalq qurum və təşkilatların qanunvericiliyinə, Dünya Ticarət Təşkilatının (DTT) tələblərinə uyğun olaraq, Azərbaycanda keyfiyyət infrastrukturunun yaradılmasından ibarətdir. Məlumat vermişdir ki, fəaliyyətə başlayan Azərbaycan Standartları Elmi Tədqiqat İnstitutunun əsas istiqamətlərindən biri Azərbaycanda beynəlxalq standartların tətbiqi və bu sahədə olan qanunvericiliyin müasir tələblərə uyğunlaşdırılmasından ibarətdir. DTT-nin "Ticarətdə Texniki Maneələr" (TBT) sazişinə uyğun olaraq, üzv ölkələrdə yaradılması məcburi olan məlumat mərkəzinin təşkili GTZ-nin dəstəyi ilə reallaşacaqdır. GTZ-nin dəstəyi əsasında standartlaşdırma, uyğunluğun qiymətləndirilməsi və metrologiya sahəsində təlim mərkəzi də yaradılır. Mərkəzin məqsədi Beynəlxalq Standartlaşdırma Təşkilatı (İSO), Avropa Standartlaşdırma Təşkilatı (CEN), Beynəlxalq Akkreditasiya Forumu (İAF), Avropa Metrologiya Təşkilatının (EUROMET) tələblərinə uyğun mütəxəssislərin hazırlanmasından ibarətdir. İnstitut tərəfindən 200-ə yaxın milli standart yaradılmışdır.
Natiq xatırlatmışdır ki, iyunun 3-6-da Bakıda Standartlaşdırma, Metrologiya və Patent üzrə Dövlətlərarası Şuranın 33-cü iclası keçirilmiş, tədbirdə Azərbaycan, Rusiya, Ukrayna, Belarus, Qazaxıstan, Özbəkistan, Tacikistan, Almaniya, Serbiya, Fransa və digər ölkələrin nümayəndələri iştirak etmişlər. İyulun 16-17-də isə paytaxtımızda “Əqli mülkiyyət və iqtisadi inkişaf” adlı beynəlxalq konfransın təşkili nəzərdə tutulmuşdur.
Ramiz Həsənov qurumun beynəlxalq əlaqələrindən danışaraq demişdir ki, Aİ, GTZ, ABŞ-ın Beynəlxalq İnkişaf Agentliyi (USAİD) ekspertləri ilə sıx əməkdaşlıq qurulmuşdur. Avropa Qonşuluq Siyasətinin texniki yardım üzrə aləti olan Tvinninq layihəsinin həyata keçirilməsi məqsədi ilə agentlikdə AB-nin ekspertləri tərəfindən keçən ilin aprel-iyun aylarında layihənin texniki şərtləri hazırlanmışdır. Cari ilin yanvarında Avropa İttifaqının və agentliyin rəhbərliyinin iştirakı ilə tender təkliflərinə baxılmış və icraçı ölkə kimi Almaniya seçilmişdir. Agentlik bu alət çərçivəsində Cənubi Qafqazda əməkdaşlıq edən ilk təşkilatdır.
Baş direktor bildirmişdir ki, ümummilli lider Heydər Əliyevin əsasını qoyduğu, Prezident İlham Əliyev tərəfindən uğurla davam etdirilən iqtisadi siyasət nəticəsində respublikada müşahidə olunan sənaye inkişaf sürətini, bu sahədə artan tələbləri qabaqlamaq və istehsalçı-istehlakçı münasibətlərini daha yaxşı tənzimləmək məqsədi ilə agentlik bir sıra islahatlar aparır. Beynəlxalq metroloji təsisatlarla əlaqələrin qurulması, respublikada ilk dəfə dünya standartlarına cavab verən etalon mərkəzinin yaradılması bu sahədə həyata keçirilən islahatların mühüm bir hissəsidir. Hazırda agentliyin metroloji balansında 21 ədəd elektrik, temperatur, təzyiq və kütlə üzrə kəmiyyət vahidlərinin etalonları vardır. Etalonların əldə edilməsi və respublikanın etalon bazasının möhkəmləndirilməsi istiqamətində beynəlxalq təşkilatlarla sıx əlaqə saxlanılır.
Baş direktor ərzaq təhlükəsizliyi ilə bağlı qurumun həyata keçirdiyi tədbirlərdə kütləvi informasiya vasitələri nümayəndələrinin yaxından iştirakı barədə arzusunu bildirmişdir.
Sonda suallar cavablandırılmışdır.
######
Bölmənin digər xəbərləri
