RƏSMİ XRONİKA
“EURONEWS” TELEKANALINA MÜSAHİBƏ
![“EURONEWS” TELEKANALINA MÜSAHİBƏ](/files/2006/2/1200x630/1490603948223620432_1200x630.jpg)
Xəbər verdiyimiz kimi, NATO Parlament Assambleyasının yaz sessiyasında iştirak etmək üçün Fransada səfərdə olan Azərbaycan Respublikasının Prezidenti İlham Əliyev mayın 29-da, onun üçün ayrılmış iqamətgahda “EuroNews” telekanalına müsahibə vermişdir.
AZƏRTAC iyunun 2-də “EuroNews” telekanalı ilə yayımlanmış həmin müsahibənin mətnini oxuculara təqdim edir.
APARICI: “EuroNews” telekanalı Azərbaycan Prezidenti İlham Əliyevlə müsahibəni təqdim edir. Müxbirimiz onunla Parisdə görüşmüşdür. O, burada NATO Parlament Assambleyasının üzvləri qarşısında çıxış etmişdir. Prezident öz çıxışında dünyada təhlükəsizliyin təmin olunması sahəsində Bakının Alyansla əməkdaşlığı barədə danışmışdır. Bununla yanaşı, Bakı Avropa üçün təkcə siyasi baxımdan deyil, həm də enerji baxımından maraq doğurur. Mayın 28-də Azərbaycan neftinin ilk hissəsi Türkiyənin Ceyhan terminalına çatmışdır. Gələcəkdə bu neft dünya bazarlarına da göndəriləcəkdir.
JURNALİST: Cənab Prezident, “EuroNews”ə xoş gəlmisiniz. Bir sıra xəbərlərə görə, Bakı-Tbilisi-Ceyhan neft kəməri artıq sentyabrda işləməyə başlayacaqdır. O, Avropanın və dünyanın energetika xəritəsində nəyi dəyişdirəcək və Azərbaycanın özünə nə kimi fayda gətirəcəkdir?
İLHAM ƏLİYEV: Bu, Azərbaycanın artıq hiss etdiyi çox böyük iqtisadi səmərə, milyardlarla dollarlıq sərmayələr, habelə Azərbaycanın öz neftini dünya bazarlarına nəql etmək imkanı deməkdir.
Bugünədək nəqletmə sistemimiz nefti ancaq Qara dəniz hövzəsinə çatdırmağa imkan verirdi. Xəzər neftinin Aralıq dənizinə çıxması tarixi hadisədir və əlbəttə, regional əməkdaşlığın daha da inkişaf etməsinə, Azərbaycanın iqtisadi, təbii ki, siyasi mövqelərinin möhkəmlənməsinə səbəb olacaq və bir çox illər və onilliklər ərzində ölkəmizin davamlı inkişafını təmin edəcəkdir.
- Bəzi xəbərlərə görə, Amerika Azərbaycanda - Xəzər sahilində hərbi qüvvələrinin olmasını istəyir. Siz bu xəbərləri necə şərh edərdiniz və Vaşinqtonla münasibətləriniz necə inkişaf edir?
- Münasibətlərimiz olduqca dinamik inkişaf edir. ABŞ ilə Azərbaycan arasındakı münasibətlər strateji tərəfdaşlıq münasibətləridir. Biz bir çox sahələrdə əməkdaşlıq edirik. Əlbəttə ki, iqtisadi sahədə, energetika sahəsində, regionda təhlükəsizlik tədbirlərini möhkəmlətmək sisteminin həyata keçirilməsində, ölkəmizdə və regionda demokratikləşmə proseslərinin inkişafında, hərbi sahədə əməkdaşlıq edirik.
O ki qaldı hansısa xarici dövlətin Azərbaycan ərazisində hərbi qüvvələrinin yerləşdirilməsinə, bu məsələ gündəlikdə durmur.
- On iki gün əvvəl, Gürcüstan, Ukrayna, Azərbaycan və Moldovanın daxil olduğu GUAM-ın zirvə toplantısında Siz bəyan etdiniz ki, bu birlik Moskvaya qarşı yönəldilməyibdir. Bu birlik nəyi əks etdirir?
- Əlbəttə ki, hər hansı digər ölkə kimi, biz də müxtəlif beynəlxalq təşkilatlarda iştirakımıza mənafelərimizin maksimum dərəcədə təmin edilməsi baxımından yanaşırıq. Bu mənada GUAM-ın üzvü olan ölkələr çərçivəsində artıq iri regional layihələr mövcuddur və onlar uğurla həyata keçirilir. Ona görə də səylər iqtisadi məsələdə, energetika, nəqliyyat məsələlərində birləşdirilərsə, bundan, əlbəttə ki, hamı qazanacaqdır. Bu təşkilatın kimlərəsə qarşı yönəldildiyi barədə söz-söhbətin heç bir əsası yoxdur. Azərbaycan kimlərəsə qarşı yönəldilən hansısa təşkilatlarda heç vaxt iştirak etməyib və biz bunu gələcəkdə də etmək fikrində deyilik.
Rusiya ilə də həm iqtisadi, həm də siyasi münasibətlərimiz çox uğurla inkişaf edir. Biz bundan çox məmnunuq və hesab edirik ki, bu, ölkələrimizin mənafelərinə tamamilə cavab verir.
- Bəzi icmalçılar deyirlər ki, GUAM ərazi bütövlüyü problemləri olan ölkələri birləşdirir. Bu, Azərbaycan üçün Dağlıq Qarabağ məsələsidir. Siz bu problemin həllini necə görürsünüz?
- Əlbəttə, burada həqiqət var. Çünki postsovet məkanındakı bütün münaqişəli vəziyyətlər məhz GUAM ölkələrinin ərazilərində baş verir. Dağlıq Qarabağ həm tarixi, həm hüquqi baxımdan Azərbaycan ərazisidir. Azərbaycanın ərazi bütövlüyü BMT tərəfindən, ölkəmizə qarşı təcavüz etmiş Ermənistandan savayı, dünyanın bütün ölkələri tərəfindən tanınmışdır. Bu təcavüz və etnik təmizləmələr siyasəti nəticəsində bir milyondan artıq azərbaycanlı qaçqına və məcburi köçkünə çevrilmişdir. Bu, çox böyük humanitar fəlakətdir, bu, özgə ərazisinin yolverilməz işğalı aktıdır. Əlbəttə ki, Azərbaycanın ərazi bütövlüyü heç bir qeyd-şərtsiz bərpa olunmalıdır.
- Keçən ilin sentyabrında Kipr Azərbaycanın “Genişlənən Avropa - yeni qonşular” proqramında iştirakına mane oldu. Bakı ilə Brüssel arasında münasibətlər necə inkişaf edir?
- Avropa İttifaqının, əslində, bütün ölkələri, ilk növbədə iri ölkələri ilə çox yaxşı münasibətlərimiz var.
Azərbaycana mane olmaq cəhdlərinə gəldikdə, bu cəhdlər uğursuzdur. Ölkəmizə mane olmaq qeyri-mümkündür, enerji ehtiyatlarına əngəl törətmək qeyri-mümkündür. Buna lüzum da yoxdur. Ona görə də hesab edirəm ki, ayrı-ayrı ölkələrin heç bir əsası olmayan hansısa fərdi məsələləri əməkdaşlığımıza əngəl törətməməlidir. Bizim Avropa İttifaqı ilə əməkdaşlığımız qarşılıqlı surətdə faydalıdır. Düşünürəm ki, bu əməkdaşlığı genişləndirmək Azərbaycan üçün çox vacibdir, Avropa İttifaqı üçün də Azərbaycanın simasında tərəfdaşa və dosta malik olmaq vacibdir.
JURNALİST: Cənab Prezident, çox sağ olun!