Faciə qurbanlarının xatirəsi Şərqşünaslıq İnstitutunda da yad edilib
Bakı, 26 fevral, AZƏRTAC
Fevralın 26-da Azərbaycan Milli Elmlər Akademiyasının (AMEA) akademik Z.Bünyadov adına Şərqşünaslıq İnstitutunda Xocalı faciəsi qurbanlarının xatirəsi yad edilib.
İnstitutdan AZƏRTAC-a bildiriblər ki, tədbirdə bu elm müəssisəsinin direktoru, Milli Məclisin deputatı, AMEA-nın müxbir üzvü Gövhər Baxşəliyeva fevralın 26-sının Azərbaycan xalqı üçün çox ağrılı bir gün olduğunu söyləyib. Xocalı soyqırımının ağır nəticələrindən danışan G.Baxşəliyeva xalqımızın bu günü böyük hüzn və kədərlə andığını qeyd edib.
Vurğulanıb ki, 1992-ci il fevralın 25-dən 26-na keçən gecə ermənilər 366-cı motoatıcı rus alayının hərbi texnikasının köməyi ilə Xocalı şəhərini yerlə-yeksan edib, günahsız insanları xüsusi amansızlıqla qətlə yetiriblər.
G.Baxşəliyeva bildirib ki, ümummilli lider Heydər Əliyev xalqın təkidli tələbi ilə yenidən hakimiyyətə qayıtdıqdan sonra bu dəhşətli cinayətə dövlət səviyyəsində qiymət verilib.
Digər çıxış edənlər Xocalı faciəsinin bəşəriyyətin və Azərbaycan xalqının tarixində ən qanlı hadisə olduğunu, xocalıların o dəhşətli gecədə özlərini əsl qəhrəman kimi apardıqlarını söyləyiblər.
Bölmənin digər xəbərləri
