Falkao transferin müzakirəsi üçün “Milan” və “Latsio” nümayəndələri ilə görüşəcək
Bakı, 27 fevral, Nicat Məmmədov, AZƏRTAC
“Monako” komandasının kolumbiyalı futbolçusu Radamel Falkao İtaliyanın “Milan” və “Latsio” klubları ilə özünün transferi barədə danışıqlar aparacaq.
AZƏRTAC TASS agentliyinə istinadla xəbər verir ki, Falkao artıq Romadadır. Burada İtaliya Kubokunun yarımfinal mərhələsi çərçivəsində “Latsio” və “Milan” komandaları arasında oyun keçiriləcək. Futbolçu “Monako”nu qarşıdan gələn yay mövsümündə tərk etmək niyyətindədir.
Falkonun Nitsadan təyyarə reysi ilə gəldiyi bildirilir. Kolumbiyalı üzünü gizlətməyə cəhd etsə də, təyyarədəki sərnişinlər və gözləmə zalındakı insanlar onu tanıyıblar.
33 yaşlı Falkao “Çelsi”, “Mançester Yunayted”, “Atletiko” və “Portu” kimi klubların idman şərəfini qoruyub. O, 2013-cü ildən “Monako”da çıxış edir, bu müddət ərzində futbolçu iki dəfə birillik icarəyə verilib. Cari mövsümdə hücumçu 28 oyunda iştirak edib, onun hesabında 10 qol və 2 məhsuldar ötürmə var. Falkaonun hazırda “Monako” ilə qüvvədə olan müqaviləsinin müddəti 2020-ci ilin yayınadəkdir.
Bölmənin digər xəbərləri
