FİLMLƏR MARAQLA QARŞILANMIŞDIR
Əvvəlcə, baş rolun ifaçısı Giorgi Masxaraşvili filmin yaranma ideyası, çəkiliş prosesi və qayəsi barədə tamaşaçılara məlumat vermişdir.
Ekran əsərində gənc rejissorun film çəkmək üçün ssenari yazmasından bəhs olunur. Ola bilsin, heç vaxt çəkilməyəcək ssenarinin qəhrəmanı doğulduğu şəhərin böyük bazara çevrilmiş küçələrində veyillənir. Küçədəki köşkdə professor alver edir, alverçi isə parlamentdə oturub. Küçə başdan-başa qaçqınlarla və cibgirlərlə doludur...
Rollarda Giorgi Masxaraşvili ilə yanaşı, Eka Nijaradze, Baadur Tsuladze, Rusiko Kobiaşvili və Berta Xapava çəkilmişlər.
Filmin quruluşçu operatoru Arçil Axvelediani, rəssamı Kote Djaparidze və Qoqi Tatişvili, bəstəkarı Niaz Diasamidzedir.
Həmin gün kinosevərlərə Litva-Fransa-Portuqaliya kinostudiyalarının birgə istehsalı olan “Yeddi gözəgörünməz” filmi də təqdim edilmişdir. Rejissor Şarunas Bartasın lentə aldığı filmdəki hadisələr keçmiş Sovetlər İttifaqının cənubunda - Krımda cərəyan edir. Gənc qadın barları bir-bir gəzən, xırda tapşırıqları yerinə yetirməkdən tutmuş, o qədər də böyük olmayan oğurluğa qədər hər şeylə məşğul olan fırıldaqçı dəstəyə qoşulur. Dəstə cəmiyyətə düşmənçilik münasibəti bəsləyir. Bunun üçün onların əsası vardır...
Rollarda Dmitri Podzonov, Rita Kleyn, Aleksandr Esaulov, Denis Kirillov, Saakanuş Vanyan, İqor Tsiqankov çəkilmişlər.
Tamaşaçılar hər iki filmi maraqla qarşılamışlar.
Bölmənin digər xəbərləri
