İQTİSADİYYAT
FinTex Alyansının sədri: Azərbaycan regionda innovasiyalar üzrə lider olmaq üçün böyük potensiala malikdir
![FinTex Alyansının sədri: Azərbaycan regionda innovasiyalar üzrə lider olmaq üçün böyük potensiala malikdir](/files/2023/3/1200x630/1701350354966949448_1200x630.jpg)
Bakı, 30 noyabr, AZƏRTAC
Azərbaycan regionda innovasiyalar üzrə lider ola bilmək üçün böyük potensiala malikdir.
AZƏRTAC xəbər verir ki, bu barədə jurnalistlərə FinTex Alyansının sədri Alaster Lukis Bakıda keçirilən “InMerge Innovation Summit” çərçivəsində bildirib.
“Azərbaycanda uğurlu innovasiya mühitinin yaradılması üçün bütün zəruri şərtlərin mövcud olduğu mənim üçün tamamilə aydındır. Nazirlərdən, yüksəkrütbəli rəhbərlərdən, novatorlardan eşitdiyimiz ondan ibarətdir ki, bu mühiti yarada bilmək üçün hər kəs birlikdə işləməyə hazırdır. İnsanlar ancaq koordinasiyalı şəkildə iş aparanda, onların uğur qazanmaq şansları yaranır” - deyə o qeyd edib.
Onun sözlərinə görə, böyük banklar, hökumət və tənzimləyici orqanlar fintex-şirkətlərlə əməkdaşlığın bütün cəmiyyət üçün böyük fayda gətirə biləcəyini başa düşməlidirlər.