FÖVQƏLADƏ HALLAR NAZİRLİYİNİN ALDIĞI YENİ TƏYYARƏNİN VƏ KATERLƏRİN TƏQDİMATI OLMUŞDUR
Azərbaycan xalqının ümummilli lideri Heydər Əliyevin 85 illik yubileyi ilə əlaqədar mayın 9-da Bakı Dəniz Vağzalında respublika Fövqəladə Hallar Nazirliyinin aldığı və fövqəladə hallar zamanı istifadə edilən BE-200ÇS markalı yeni amfibiya təyyarəsinin və dörd ədəd sürətli patrul katerlərinin təqdimatı olmuşdur.
Almaniya istehsalı olan bu təyyarə hazırda dünyadakı ən müasir standartlara cavab verir. Əsasən yanğınsöndürmədə istifadə edilən təyyarə dənizdən birbaşa 12 ton sugötürmə qabiliyyətinə malikdir. Sahildən uzaq məsafədə yerləşən neft-qaz çıxarma obyektlərində hər hansı qəza baş verərsə, digər texnikalar hadisə yerinə çatana qədər qısa müddətdə alovu söndürməyə qadirdir. Təyyarədən meşə yanğınlarının söndürülməsində də istifadə olunacaqdır.
BE-200ÇS markalı təyyarə dünyada cəmi 5 ədəddir - dördü Rusiyada, biri isə Azərbaycandadır. Avropa İttifaqı ilə və bəzi dövlətlərlə imzalanmış müqavilələrə əsasən, yaxın və orta uzaqlıqda yerləşən ölkələrdə fövqəladə hallar zamanı Azərbaycan təyyarə, habelə 4 vertolyot, 300 xilasedici və yanğınsöndürənlə öz köməyini göstərə biləcəkdir.
Sank-Peterbuqdan alınmış sürətli katerlər patrul və xilasetmə işləri üçün nəzərdə tutulmuşdur. İnsan həyatı və digər məsələlərlə bağlı təhlükəli vəziyyətlərdə hadisə yerinə başqa gəmilərin 4 saatda getdiyi məsafəni bu katerlər 45 dəqiqəyə qət edə bilir.
Sonra Bakı buxtasında təyyarə və gəmilərin taktiki-texniki xüsusiyyətləri, dənizdən sugötürmə, neft və neft məhsulları saxlanılan çənlərdə, digər obyektlərdə yanğının söndürülməsi əməliyyatları, suda xilasetmə işlərində istifadə metodları, habelə zərərçəkənlərə və xəstələrə ilkin tibbi yardım göstərilməsi qaydaları nümayiş etdirildi.
Pilotlar, yanğınsöndürənlər, xilasedicilər sərnişin və yük gəmilərində, neft-qaz platformalarında baş verən yanğınların qarşısının alınması, insanların xilas olunması sahəsində bacarıqlarını göstərdilər.
Nazir Kəmaləddin Heydərov məlumat verərək dedi ki, Azərbaycan Prezidenti, Ali baş komandan İlham Əliyevin tapşırığı ilə nazirlik iki ildir öz maddi-texniki bazasını yaratmaqdadır. Azərbaycanın neft-qaz hasil edən ölkə olmasını, əsas yataqların dənizdə yerləşməsini, ümumiyyətlə, ölkə vətəndaşlarının tam təhlükəsiz şəraitdə yaşamasının təmin edilməsini nəzərə alaraq, dövlətimizin başçısı ən müasir xilasetmə, yanğınsöndürmə texnikası və avadanlığının alınması üçün tapşırıqlar vermiş, bunlarla bağlı mühüm sənədlər imzalamışdır. Hazırda bütün regional mərkəzlər üçün də texnika alınır, nazirliyin digər qurumlarının maddi-texniki bazası təkmilləşir. Qısa zamanda lazım olan bütün avadanlıq alınacaqdır.
Mərasimdə Azərbaycan Prezidentinin müdafiə məsələləri üzrə köməkçisi general-leytenant Vahid Əliyev, Dövlət Sərhəd Xidmətinin rəisi general-leytenant Elçin Quliyev və digər rəsmi şəxslər iştirak edirdilər.
######
 |
 |
 |
