Fransa BMT-nin fələstinli qaçqınlara dəstək agentliyinə maliyyə ayırmasını dayandırıb
Bakı, 28 yanvar, AZƏRTAC
Fransa BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyinə müvəqqəti olaraq maliyyələşdirməni dayandırıb.
AZƏRTAC xəbər verir ki, bu barədə Fransa Xarici İşlər Nazirliyi məlumat yayıb.
“Fransa 2024-cü ilin birinci yarısında heç bir əlavə ödəniş etməyi planlaşdırmır, vaxtı gələndə BMT və əsas donorlarla birlikdə yardımın şəffaflığı və təhlükəsizliyi ilə bağlı bütün tələblərin nəzərə alınmasını təmin edərək qərar verəcək”, - məlumatda deyilir. Xatırladıb ki, 2023-cü il üçün Paris agentliyə 60 milyon avro ayırmışdı.
Nazirlik vurğulayıb ki, BMT agentliyinin əməkdaşlarının HƏMAS-ın əməllərində iştirakı ilə bağlı səslənən məlumatları ciddi hesab edir.
Bundan əvvəl bəzi ölkələr, o cümlədən Böyük Britaniya, Kanada, ABŞ və Almaniya da təşkilatın HƏMAS-la əlaqələri olan bəzi əməkdaşlarına qarşı şübhələr fonunda Fələstinli Qaçqınlara Yardım və İşlər üzrə Agentliyə maliyyənin dayandırıldığını açıqlamışdı.
Bölmənin digər xəbərləri
