FRANSA PREZİDENTİ ƏFQANISTANA SƏFƏR ETMİŞDİR

21.08.2008 [10:24]
Çap et
A⁺ A^-

AZƏRTAC-ın xüsusi müxbiri Yelisey sarayının mətbuat xidmətinə istinadla xəbər verir ki, avqustun 19-da hərbi əməliyyat keçirilən zaman talibanların pusqusuna düşmüş fransız hərbi birləşmələrinin 10 əsgərinin həlak olması və 21 nəfərin yaralanması ölkədə böyük əks-səda doğurmuşdur. Son 7 ildə Fransa hələ bu qədər itki verməmişdir. Vəziyyətlə yerindəcə tanış olmaq və həlak olmuş əsgərlərin xatirəsini yad etmək məqsədi ilə Prezident Nikola Sarkozi avqustun 20-də Əfqanıstana gəlmişdir.

Səfər zamanı ölkə başçısı Əfqanıstandakı beynəlxalq hərbi birləşmələrin tərkibindəki fransız kontingenti ilə görüşmüşdür. Qanlı döyüşün təfərrüatı barədə Nikola Sarkoziyə ətraflı məlumat verilmişdir. Prezident xəstəxanada yaralılara baş çəkmiş və onların vəziyyəti ilə maraqlanmışdır. Daha sonra N.Sarkozi Kabul regionundakı beynəlxalq hərbi birləşmələrin komandanı fransız generalı ilə görüşmüşdür.

Səfərin sonunda Əfqanıstan Prezidenti Həmid Kərzayi öz iqamətgahında fransalı həmkarı ilə görüş keçirmişdir.

Görüşdə prezidentlər son vaxtlar baş vermiş hadisələr barədə fikir mübadiləsi aparmış, Yaxın Şərqdə vəziyyəti müzakirə etmişlər.

Səfərdə Prezidenti xarici işlər və müdafiə nazirləri müşaiyət etmişlər.

Xatırladaq ki, Əfqanstandakı NATO hərbi qüvvələrinin tərkibində fransanın 3000 əsgəri vardır.