FRANSADA QAZIN VƏ ELEKTRİK ENERJİSİNİN QİYMƏTLƏRİ QALDIRILIR

25.10.2004 [10:44]
Çap et
A⁺ A^-

AZƏRTAC-ın xüsusi müxbiri xəbər verir ki, son zamanlar Fransada bir çox sahələrdə qiymətlərin qalxması müşahidə edilir. Gündəlik «Le Parizyən» qəzetində noyabr ayının 1-dən qazın və elektrik enerjisinin qiymətlərinin 12-13 faiz qaldırılacağı barədə xəbər dərc olunmuşdur. Qiymətlərin qaldırılması birinci mərhələdə 7-9 , ikincidə isə 3-3,5 faiz təşkil edəcəkdir. Qaz və elektrik enerjisi qiymətlərinin qaldırılmasına səbəb kimi dünya bazarında neftin qiymətinin bahalaşması göstərilmişdir.

Xəbərdə daha sonra ölkədəki atom elektrik stansiyalarının fəaliyyəti hesabına elektrik enerjisinin qiymətinin cüzi miqdarda, cəmi 3 faiz qaldırılacağı bildirilmişdir.

Qaza gəldikdə isə onun qiymətinin tədricən qaldırılması nəzərdə tutulmuşdur. Üç il ərzində qazın qiymətinin 7,5 faiz bahalaşacağı bildirilmişdir.

Xatırladaq ki, Fransada qazın qiyməti sonuncu dəfə 2000-ci ildə 13 faiz qaldırılmışdır.