DÜNYA
FRANSANIN AZƏRBAYCANDAKI SƏFİRİ LƏNKƏRANDA OLMUŞDUR
Martın 29-da Fransanın Azərbaycandakı Fövqəladə və Səlahiyyətli səfiri xanım Şantal Puare və səfirliyin müşaviri Jerar Nero hər il mart ayının sonlarında dünyanın bir çox ölkəsində keçirilən beynəlxalq “La Frankofoni” bayramı münasibətilə Lənkərana gəlmişlər.
Hörmətli qonaqlar əvvəlcə Lənkəran Dövlət Universitetinə getdilər. Strasburq Universiteti ilə elmi əlaqə yaratmış bu ali təhsil müəssisəsini Fransa səfirliyi müvafiq dərsliklər, kompüter dəstləri, digər ləvazimatla təchiz edir. Burada yüksək ixtisaslı bir neçə fransalı pedaqoq da çalışır. Səfir fransız dili fakultəsinin tələbələri ilə görüşdən razılığını “siz bizi fransızlar sayağı qarşıladınız” - sözləri ilə bildirdi.
Qonaqlar Lənkəran Şəhər İcra Hakimiyyətində mehribanlıqla, gül-çiçəklə qəbul edildilər. İcra hakimiyyətinin başçısı Yaşar Rzayev, universitetin rektoru, professor Mirzəağa Bağırov rayonun, şəhərin iqtisadi, sosial, elmi həyatı ilə maraqlanan səfirin suallarına ətraflı cavablar verdilər. Xüsusi vurğulandı ki, rayonun 12 orta məktəbində də fransız dili tədris olunur və şagirdlər bu dili həvəslə öyrənirlər.
Günortadan sonra qonaqlar Nəcəf bəy Vəzirov adına Lənkəran Dövlət Dram Teatrında universitet tələbələrinin ifasında M.F.Axundovun “Müsyo Jordan və dərviş Məstəli şah” əsərinin fransız dilində tamaşasına baxdılar. Gənclər başqa ədəbi əsərlərdən də fransız dilində parçalar səsləndirdilər.
Daha sonra qonaqlar Lənkəranın görməli yerləri ilə tanış oldular.