FÜZULİ RAYON İCRA HAKİMİYYƏTİNİN BAŞÇISI NƏBİ MUXTAROVUN ÇIXIŞI
-Zati-aliləri, möhtərəm cənab Prezident!
Dağlıq Qarabağ probleminin Azərbaycanın ərazi bütövlüyü və sülh danışıqları çərçivəsində həlli, qaçqın və məcburi köçkünlərin öz torpaqlarına qaytarılması istiqamətində apardığınız uğurlu fəaliyyətinizə, Füzuli rayonuna göstərdiyiniz qayğıya, köməyə, yaratdığınız şəraitə, Azərbaycanı bölgənin lider dövlətinə çevirdiyinizə görə bütün füzulililərin minnətdarlığını Sizə çatdırıram.
Rayonumuzun 139 min hektar ərazisinin işğaldan azad edilmiş 50 min hektarından istifadə olunur. Sizin düşünülmüş çevik iqtisadi siyasətinizin nəticəsidir ki, ölkəmizin bütün bölgələri kimi, rayonumuz da sürətlə inkişaf edir. Horadiz qəsəbəsi və işğaldan azad edilmiş 21 kənd öz simasını dəyişir, yeni iş yerləri açılır, əhalinin sosial-iqtisadi problemləri sürətlə həll edilir.
Haramı adlanan ərazidə ulu öndər Heydər Əliyevin tapşırığı, cənab Prezident, Sizin yaxından köməyiniz və qayğınız nəticəsində tikilmiş 11 qəsəbədə artıq 10 mindən çox əhali yaşayır.
Zati-aliləri, bu bir həqiqətdir ki, məcburi köçkün problemi ümummilli liderimiz Heydər Əliyevin başladığı və Sizin tərəfinizdən uğurla davam etdirilən işlər nəticəsində faktik olaraq həll olunmaqdadır. Sizə inam və məhəbbətin nəticəsidir ki, sosial vəziyyətləri gündən-günə yaxşılaşan füzulililərin 60 min nəfəri bu gün qayıdaraq işğaldan azad edilmiş ərazilərdə yaşayırlar. Sizin tapşırığınızla tikilən 2 mindən çox evin cari ilin sonunda istifadəyə verilməsi nəticəsində əlavə 10 mindən artıq əhali qayıdacaq, işğaldan azad olunmuş ərazidə yaşayacaq. Beləliklə, öz ərazimizdə məskunlaşan əhalinin sayı 70 min nəfərə çatacaqdır. Bu da ümumi əhalinin 65 faizini təşkil edəcəkdir. Statistikaya görə işğaldan əvvəl bu ərazidə 28 min nəfər əhali yaşamışdır.
Cənab Prezident, Sizin qayğınız nəticəsində əhalinin doğma torpaqlarına qayıtması hamıda yüksək minnətdarlıq hissi doğurmuşdur. 2005-ci ilin iyun ayında qaçqınların və məcburi köçkünlərin probleminin həlli ilə bağlı keçirilən müşavirədə Sizin tapşırığınızla 4,2 kilometr məsafəyə Yuxarı Mil kanalının çəkilişi məcburi köçkünlərin hədsiz sevincinə səbəb olmuş, suvarmada olan problemləri əsasən həll etmişdir. Daxili imkanlar hesabına yerli materiallardan daha 10 yaşayış məntəqəsi tikilmişdir. Lakin həmin binaların əsaslı təmirinə və yenidən qurulmasına ehtiyac hiss edirik.
Möhtərəm cənab Prezident!
Sizin həyata keçirdiyiniz əməli tədbirlər nəticəsində füzulililər işğaldan azad edilmiş torpaqlarda hər il orta hesabla 25 min tona qədər taxıl istehsal edir, bostan-tərəvəz məhsulları becərir, sosial vəziyyətlərini yaxşılaşdırırlar. Hazırda ərazidə 21 min başdan yuxarı qaramal, 70 min başa yaxın qoyun-quzu saxlanılır. Sizin tapşırığınıza uyğun olaraq, rayonun iqtisadiyyatı üçün önəmli sayılan üzümçülüyün inkişafına geniş diqqət yetirilir. Torpaqların üzüm bağlarına verilməsi 3 il müddətində 15 min nəfərin daimi iş yeri ilə təmin olunması deməkdir. Bu, həm də iqtisadiyyatın bərpasına, sosial şəraitin daha da yüksəlməsinə səbəb olacaqdır. Rayon ərazisində tikinti-abadlıq işləri üçün 2006-cı ilin sentyabrında ayırdığınız 2 milyon manat hesabına 4 məktəb, 2 mədəniyyət evi təmir olunmuş, gənclər evi tikilmiş, tarix-diyarşünaslıq muzeyinin tikintisi başa çatmaq üzrədir. Horadiz qəsəbəsində aparılan abadlıq işləri, işıqlandırma sisteminin qurulması, yolların asfaltlaşdırılması, kanalizasiya xəttinin işə salınması əhalinin çox böyük razılığına səbəb olmaqla qəsəbənin simasını dəyişdirmişdir.
Sizin tapşırığınıza əsasən rayonda müalicə-diaqnostika mərkəzinin və su elektrik stansiyasının tikilməsi xəbəri Füzuli əhalisinin böyük sevincinə səbəb olmuşdur. Cənab Prezident, füzulililər həmin tikintinin təməlqoyma mərasiminin Sizin iştirakınızla keçirilməsini səbirsizliklə gözləyirlər.
Möhtərəm cənab Prezident!
Sizin tapşırığınızla yaradılan yaxşı şəraitdən razı qalan füzulililər doğma torpaqlarına qayıdır, yaşayır və öz həyatlarını yenidən qururlar. Onların içərisində dağılmış və yandırılmış evlərinə qayıdanlar da çoxdur. 1500 belə ailənin evlərinin qismən bərpa olunmasına, Qarabağ və Babı kəndlərinin içməli su ilə təmin olunmasına kömək göstərməyinizi xahiş edirik.
Horadiz qəsəbəsi Füzuli rayonunun mərkəzi rolunu oynayır. Rayonun bütün infrastrukturu Horadiz qəsəbəsində fəaliyyət göstərir. Qəsəbəyə şəhər statusu verilməsi və onun yenidən planauyğun tikilməsi məsələsinə baxmağınızı xahiş edirik. Bu, erməni işğalçıları ilə üzbəüz dayanan füzulililərin böyük sevincinə səbəb olar.
Zati-aliləri, bütün məcburi köçkünlərə və o cümlədən füzulililərə göstərdiyiniz qayğı və diqqətə görə Sizə dərin minnətdarlığımızı bildirir və Sizi əmin edirik ki, füzulililər Azərbaycanın ümumi inkişafında öz layiqli yerlərini tutacaqlar.
Diqqətinizə görə çox sağ olun!
Bölmənin digər xəbərləri
