GƏNCƏDƏ 20 YANVAR ŞƏHİDİNİN AİLƏSİ ZİYARƏT EDİLMİŞDİR
Gəncə, 19 yanvar (AZƏRTAC). Kəpəz Rayon İcra Hakimiyyətinin nümayəndələri 20 Yanvar faciəsində şəhid olmuş Milli Qəhrəman Valeri Boqdanovun ailəsini ziyarət etmişlər.
Şəhidin xatirəsi hörmətlə yad edildikdən sonra ailə üzvləri ilə səmimi söhbət aparılmışdır. Söhbət zamanı qeyd olunmuşdur ki, Vətən, xalq, eləcə də yüksək amallar uğrunda şəhid olan Azərbaycan övladlarının yaxınları matəm saxlamaqla bərabər, həm də qürur duymalıdırlar. Çünki şəhidlərimiz xalqın qəlbində əbədi yaşayırlar. Onların rəşadəti gələcək nəsillər üçün əsl vətəndaşlıq məktəbidir.
Milli Qəhrəmanın anası Valentina Boqdanova oğlunun xatirəsinin daim əziz tutulduğunu qeyd etmiş və dövlət tərəfindən ona diqqət və qayğı göstərildiyini bildirərək demişdir ki, 20 Yanvar faciəsində mənim kimi yüzlərlə ana öz övladını itirmişdir. Lakin bu itki Vətən yolunda olduğu üçün qürur duyuruq. Bu gün respublikamızda şəhidlərimizə layiq olduqları qiymətin verilməsi mənə təsəllidir və bunun üçün ölkə başçısına minnətdaram.
Bölmənin digər xəbərləri
