GƏNCƏDƏ “CAVAD XAN” FİLMİ TƏQDİM EDİLMİŞDİR
Gəncə, 18 sentyabr (AZƏRTAC). Gəncədə görkəmli dövlət xadimi və sərkərdə Cavad Xanın həyat və fəaliyyətindən bəhs edən “Cavad Xan” filmi təqdim edilmişdir.
Şəhər ictimaiyyəti nümayəndələrinin iştirakı ilə keçirilən mərasimdə filmin rejissoru Rövşən Almuradlı, ssenari müəllifi Sabir Rüstəmxanlı, baş rolun ifaçısı, xalq artisti Nürəddin Mehdixanlı və başqaları çıxış edərək mürəkkəb süjetə malik filmin üzərində apardıqları yaradıcılıq işlərindən danışmışlar. Qeyd olunmuşdur ki, gərgin dramatizmlə zəngin olan, natura və pavilyon çəkilişləri əsasən Bakı, Gəncə, Zaqatala və Şəki şəhərlərində aparılan film üzərində 500-dən artıq yaradıcı və texniki əməkdaş çalışmış, döyüş səhnələrinə 26 nəfər kaskadyor cəlb edilmişdir.
Filmin nümayişindən sonra Gəncə Şəhər İcra Hakimiyyətinin başçısı Eldar Əzizov, şəhər mədəniyyət idarəsinin rəisi Mina Məlikova və tarixçi alim Mübariz Əliyev çıxış edərək görkəmli sərkərdə Cavad Xana ekran həyatı verən yaradıcı kollektivə minnətdarlıq etmiş və gənc nəslin vətənpərvərlik tərbiyəsinin gücləndirilməsində filmin dəyərini yüksək qiymətləndirmişlər.
Bölmənin digər xəbərləri
