QAN YADDAŞI
GƏNCƏDƏ HƏVƏSKAR KİNOOPERATORUN 20 İL ƏVVƏL ÇƏKDİYİ FİLMİN NÜMAYİŞİ OLMUŞDUR
Gəncə, 19 yanvar (AZƏRTAC). Ötən əsrin 90-cı illərinin əvvəllərində Gəncə və ətraf rayonlarda gedən döyüşlərdə qəhrəmanlıq göstərən, hətta bu yolda həlak olan yüzlərlə azərbaycanlının qəhrəmanlıq şücaətini yaddaşlara köçürmək üçün həyatını təhlükəyə atanlar arasında həvəskar kinooperator Azər Axundov da olmuşdur.
Gəncədəki Azərbaycan Dövlət Aqrar Universitetinin texniki-yaradıcılıq dərnəyində fotoqraf-kinooperator kimi çalışan 58 yaşlı Azər Axundov yanvarın 19-dan 20-nə keçən gecə rus ordusu tərəfindən Bakıda törədilən qırğından xəbər tutan kimi kinokamerasını götürərək erməni işğalçılarına qarşı aparılan döyüş bölgələrinə çıxmış və ən çətin, hətta həyatı üçün çox təhlükəli olan səhnələri 16 millimetrlik lentə köçürmüşdür.
20 Yanvar faciəsinin 20-ci ildönümü ərəfəsində həvəskar kinooperator çəkdiyi kadrları birləşdirərək sənədli film yaratmışdır. Bu günlərdə Azərbaycan Dövlət Aqrar Universitetində filmin nümayişi olmuşdur. Nümayişdən sonra çıxış edənlər onun yaradıcısına minnətdarlıq etmiş və filmin gələcək nəsillər üçün qiymətli arxiv materialı olduğunu vurğulamışlar.