Gəncənin “Xan bağı”nda qurumuş ağac və budaqlar niyə budanmır? FOTO VİDEO
Gəncə, 3 may, Elcan Məmmədov, AZƏRTAC
Gəncənin dilbər guşələrindən olan “Xan bağı” sakinlərin əsas istirahət məkanlarından biridir. Şəhər sakinlərinin intensiv olduğu və mərkəzdə yerləşən bu məkanda insanlar ilin istənilən fəslində gəzib, dincələ bilir. Lakin son günlərdə şəhər sakinləri “Xan bağı”nda gəzməyə ehtiyat edirlər. İki əsr yaşı olan bu parkın qurumuş ağacları və bəzi ağacların budaqları sakinlər üçün əsl təhlükə mənbəyinə çevrilib.
AZƏRTAC-ın bölgə müxbiri “Xan bağı”nda sakinlərlə söhbət edib, aidiyyəti qurumların və mütəxəssislərin məsələyə münasibətini öyrənib.
Şəhər sakini Nəzakət Kərimova həm dincəlmək, həm də gəzmək üçün böyükdən-kiçiyə hamının üz tutduğu bu parkın əsas problemlərindən birinin qurumuş ağaclar olduğunu deyir: “Yaxşı olardı ki, park ərazisində qurumuş ağacları və onların budaqlarını kəsib təmizləyərdilər. İnsanlar istirahət edən zaman güclü külək olarsa, qurumuş ağaclar əsl təhlükə mənbəyinə çevrilir. Xahiş edirik aidiyyəti qurumlar bu məsələni diqqətdə saxlasınlar”.
“Biz tez-tez “Xan bağı”nda gəzintiyə çıxırıq. Qurumuş ağaclarla, yaxud da qurumuş budaqlarla rastlaşırıq. Şəxsən mən bir neçə dəfə belə halla rastlaşmışam, az qalıb ki, qurumuş ağacın budağı üzərimizə düşsün,” - deyə parkda gəzintidə olan şəhər sakini Vahid Əliyev deyir.
Məkana gələnlər arasında təqaüdçülər də var. “Xan bağı”nın bu problemi onları da narahat edir. Təqaüdçü Eldar Məmmədov parkın təmizlik və səliqə-sahmanından razı olsa da, qurumuş ağacların törətdiyi təhlükələrdən narahatdır: “Bu Parkda demək olar, günaşırı oluram. Əsas problemlərdən biri ağacların qurumasıdır. Xahiş edirəm ki, sakinlərin təhlükəsizliyi üçün əlaqədar təşkilatlar məsələ ilə məşğul olsunlar”.
Mütəxəssis Hüseyn İdrisov isə ağacların quruma səbəbindən danışarkən deyib ki, ilkin müşahidələr zamanı ağacların qurumasına səbəb kimi bitki üçün lazımi qidanın, suyun düzgün verilməməsi və kənar mühitin təsiri görünür. Qurumuş ağaclardan əmələ gələn bakteriyalar və göbələklər digər ağaclara yoluxaraq onları da inkişafdan saxlaya bilər.
Məsələyə münasibət bildirən Gəncə şəhər Mənzil-Kommunal Təsərrüfatı İstehsalat Birliyinin Yaşıllaşdırma şöbəsinin rəisi Elmar Əzizov bu məsələnin tezliklə həll olunacağını bildirib: “Park ərazisində hər hansı bir ağacın və ya onun budağının quruması ilə bağlı müvafiq ekoloji idarələrə müraciət edirik. Müraciətimiz əsasında ekoloqlar müvafiq rəy verirlər və dərhal tədbir görürük. “Xan bağı”nın bəzi yerlərində ağacların sıx olması onun təbii quruluşuna görədir. Bəzən bu sıxlıq səbəbindən bir çox yerdə ağacları budamaqda çətinlik çəkirik. Park ərazisindəki qurumuş ağaclar və ağac budaqları ilə bağlı artıq aidiyyəti qurumlara müraciət etmişik. Müraciətimizə baxıldıqdan sonra dərhal müvafiq tədbirlər görəcəyik”.
Şöbənin baş aqronomu Rizvan Quluyev isə qeyd edib ki, “Xan bağı”nın ərazisində 65 növdən çox ağac və kol var. Parka mütəmadi qulluq olunur, aqrotexniki tədbirlər həyata keçirilir. Ərazidə bioloji inkişafını başa vurmuş 7 ağac var. Bunların 4-ü Sərv, 1-i Eldar şamı, 1-i akasiya, 1-i isə qovaq ağacıdır. Bu ağacların zərərsizləşdirilməsi ilə bağlı aidiyyəti qurumlardan müsbət cavab almışıq. Qarşımızdakı iki-üç gün ərzində parkdakı bu problemlər aradan qalxacaq.
Qafqazın ən qədim parklarından biri olan “Xan bağı” 1847-ci ildə çarın Qafqazdakı canişini (sərdarı) knyaz Mixail Vorontsovun təşəbbüsü ilə salınıb. Rəsmi sənədlərdə belə “Xan bağı” adlandırılsa da əslində, adı “Sərdar bağı”dır.
Ümid edirik ki, Gəncənin qədim istirahət məkanlarından olan “Xan bağı”nda qurumuş ağac və budaqların budanması məsələsi yaxın günlərdə öz həllini tapacaq.
Qeyd edək ki, 2011-ci ildə Prezident İlham Əliyev Gəncədə əsaslı yenidənqurma işləri aparılan “Xan bağı” mədəniyyət və istirahət parkının açılışında iştirak edib. Dövlət başçısının tapşırığına əsasən ayrılan vəsait hesabına görülən yenidənqurma işlərindən sonra parkın siması tamamilə dəyişib. Qafqazın ən qədim parklarından biri, yaşı 300-dən çox olan “Xan bağı”nda belə genişmiqyaslı yenidənqurma işləri ilk dəfə Prezident İlham Əliyevin tapşırığı ilə həyata keçirilib.
Bölmənin digər xəbərləri
