Gənclər Kitabxanasında Azərbaycanda İnsan Hüquqları Gününə həsr olunmuş tədbir təşkil edilib
Bakı, 16 iyun, AZƏRTAC
Cəfər Cabbarlı adına Respublika Gənclər Kitabxanasında 18 İyun - Azərbaycanda İnsan Hüquqları Günü ilə əlaqədar tədbir təşkil olunub.
Kitabxanadan AZƏRTAC-a bildirilib ki, tədbirdə bu günün əhəmiyyətindən danışılıb.
Kitabxananın direktoru Aslan Cəfərov Prezident İlham Əliyev tərəfindən 2007-ci ildə hər il iyunun 18-nin İnsan Hüquqları Günü kimi qeyd edilməsinə dair Sərəncam imzalandığı və həmin tarixdən bu günədək insan hüquqları sahəsində böyük irəliləyişlərə nail olunduğu, müxtəlif qanunvericilik aktları qəbul edildiyi haqqında məlumat verib. Həmçinin Ulu Öndər Heydər Əliyevin ilk dəfə insan hüquqları üzrə müvəkkil institutunun təsis edilməsi üçün 1998-ci il fevralın 22-də “İnsan və vətəndaş hüquqlarının və azadlıqlarının təmin edilməsi sahəsində tədbirlər haqqında” Fərman imzalaması, habelə 1998-ci il 18 iyun tarixli Sərəncamı ilə təsdiq edilən Dövlət Proqramında İnsan Hüquqları üzrə Müvəkkil təsisatının yaradılmasından danışıb. O, eyni zamanda Ombudsman təsisatının yaradılmasının hüquqi dövlət quruculuğu istiqamətində aparılan islahatların məntiqi davamı olduğunu bildirib. Həmçinin Prezident İlham Əliyevin 2006-cı il dekabrın 28-də imzaladığı “Azərbaycan Respublikasında insan hüquqlarının müdafiəsi üzrə Milli Fəaliyyət Planının təsdiq edilməsi haqqında” Sərəncamda Azərbaycanın müasir inkişaf dövründə hüquqi dövlət quruculuğu və insan hüquqlarının müdafiəsi sahəsində səylərin gücləndirilməsinin dövlət siyasətinin əsas istiqamətlərindən biri olduğunu qeyd edib.
Elmi işlər üzrə direktor müavini Günay Həsənova, şöbə müdirləri Tamella Məmmədova və Səadət Şəfiyeva Azərbaycan Respublikasının İnsan Hüquqları haqqında beynəlxalq sazişlərə qoşulması, bu sahədə elmi-tədqiqat institutunun yaradılması, normativ-hüquqi aktların insan hüquqlarına dair beynəlxalq standartlara tam uyğunluğunun təmin edilməsi, hüquqi mexanizmlərin təkmilləşdirilməsi, insan hüquqları sahəsində fəaliyyət göstərən qurumlarla əməkdaşlığın daha da inkişaf etdirilməsi, bu sahədə fəaliyyət göstərən beynəlxalq institut və mərkəzlərdə tədqiqat, təhsil problemləri üzrə mütəxəssislərin hazırlanması haqqında məlumat veriblər.
Tədbirdə kitabxana əməkdaşları tərəfindən hazırlanan videomaterial və virtual sərgi nümayiş olunub.
Bölmənin digər xəbərləri
