Gənclər Kitabxanasında əmək qəhrəmanına həsr olunmuş kitabın təqdimatı keçirilib
Bakı, 10 mart, AZƏRTAC
Respublika Gənclər Kitabxanasında Mədəniyyət Nazirliyinin dəstəyi, “Mirvarid Dilbazi Poeziya Məclisi” İctimai Birliyinin təşəbbüsü və təşkilatçılığı ilə Prezident təqaüdçüsü, əmək qəhrəmanı, ictimai xadim Tərlan Musayevanın 70 illik yubileyi münasibətilə işıq üzü görən "Ulu Öndərin "canlı əsəri" Tərlan" kitabının təqdimatı olub.
Kitabxanadan AZƏRTAC-a bildirilib ki, tədbirdə çıxış edən “Mirvarid Dilbazi Poeziya Məclisi” İctimai Birliyinin sədri, “Kəlağayı” muzeyinin direktoru, kitabın redaktoru, şair-publisist Güllü Eldar Tomarlı kitabda Tərlan Musayevanın parlaq səhifələrlə yaddaqalan ömür yolundan, ictimai fəaliyyətindən bəhs edildiyini, bu fədakar, əməksevər, qəhrəman xanımın hər kəsə bəlli olan əməyindən, uğurlarından, gözəl insani keyfiyyətlərindən söhbət açıldığını söyləyib. “Tərlan Musayevanın ömür yolu müasir gənclik üçün zəhmətsevərlik, vətənpərvərlik simvoludur. Kitabın təqdimatı ölkənin müxtəlif şəhər və rayonlarında, mədəniyyət ocaqlarında keçiriləcək”, - deyə o əlavə edib.
Kitabın müəllifi yazıçı Vaqif Osmanlı Tərlan Musayeva kimi əmək qəhrəmanlarının gələcək nəsillər üçün örnək olduğunu bildirib.
Vətən müharibəsi qazisi, şair Rafael Tağızadə, filologiya üzrə fəlsəfə doktoru Fəridə Ləman kitabda müəllifin çox böyük əmək sərf edərək bu məsuliyyətli işə əsl araşdırmaçı məharəti ilə yanaşdığını və sadə zəhmət adamının şəxsiyyətinə, mənəvi dünyasına işıq salındığını bildirib.
Daha sonra Fəridə Ləman müəllifi olduğu kitabları yubilyara hədiyyə edib.
Tərlan Musayeva qazandığı bütün uğurlara görə özünü Ümummilli Lider Heydər Əliyevə borclu bildiyini xüsusi vurğulayaraq, onun haqqında yazılmış kitabın ərsəyə gəlməsində əməyi olan hər kəsə təşəkkür edib.
Sonda kitabın imzalı nüsxələri tədbir iştirakçılarına və kitabxanaya hədiyyə olunub.
Bölmənin digər xəbərləri
