GÖRKƏMLİ RİYAZİYYATÇI ALİMİN YUBİLEYİ
Aprelin 24-də Azərbaycan Milli Elmlər Akademiyası Rəyasət heyətinin binasında görkəmli riyaziyyatçı, dünya şöhrətli alim, akademik İbrahim İbrahimovun anadan olmasının 90 illiyinə həsr edilmiş respublika konfransı keçirilmişdir.
Konfrans iştirakçıları yubilyarin həyatını əks etdirən foto-stendə və elmi əsərlərindən ibarət sərgiyə baxdılar.
MEA-nın vitse-prezidenti Arif Mehdiyev konfransı açaraq, ölkəmizdə riyaziyyat elminin inkişafında, bu sahə üzrə kadrların yetişdirilməsində akademik İbrahim İbrahimovun əvəzsiz xidmətlərindən danışdı. Onun Azərbaycanda ilk riyaziyyatçı alim olduğunu, 50 nəfərdən artıq elmlər namizədi və doktoru yetişdirdiyini, 150-dən artıq əsər, o cümlədən bir sıra dərslik və kitab yazdığını vurğulayan natiq, görkəmli elm xadiminin həm də yüksək insani keyfiyyətlərindən söhbət açdı.
MEA-nın fizika-riyaziyyat və texnika elmləri bölməsinin akademik-katibi Akif Hacıyev “İbrahim İbrahimovun həyatı və elmi fəaliyyəti” mövzusunda geniş məruzə etdi. Natiq dedi ki, Ibrahim İbrahimov Azərbaycanda riyaziyyat elmini dünya miqyasına çıxaran alımlərdən olmuşdur. M.Keldış, S.Bernşteyn, S.Nikolski, A.Qelfond, M.Lavrentyev kimi görkəmli riyaziyyatçılarla əməkdaşlıq edən İ.İbrahimov haqlı olaraq, həm də Moskva riyaziyyat məktəbinin nümayəndələrindən biri hesab edilir.
Akademiklər İsmayıl İbrahimov, Cəlal Allahverdiyev, Telman Əliyev və başqaları İbrahim İbrahimovun pedaqoji fəaliyyətindən bəhs etdilər, onunla bağlı xatirələrini danışdılar.
Bölmənin digər xəbərləri
