GÖYÇAYDA NAR BAYRAMI
Şəhərin bayramsayağı bəzədilmiş girişində minlərlə göyçaylı mədəniyyət və turizm naziri Əbülfəs Qarayevi, kənd təsərrüfatı naziri İsmət Abasovu, gənclər və idman naziri Azad Rəhimovu, eləcə də Milli Məclisin deputatlarını, Çinin və Misirin ölkəmizdəki səfirlərini, habelə Ağdaş, Ucar, Zərdab və Ağsu rayonlarından dəvət edilmiş qonaqları musiqi sədaları altında qarşılamış, onlara yerli istehsaldan olan nar məhsulları təklif etmişlər. Burada rayonun 30-a yaxın kəndindən gətirilmiş müxtəlif çeşidli nar və nar məhsulları barədə qonaqlara geniş məlumat verilmişdir.
Sonra nümayəndələr şəhərin Heydər Əliyev seyrəngahına gəlmişlər. Burada onları idmançılar, kəndirbazlar, rəqs qrupları qarşılamışlar. Nümayəndə heyəti Azərbaycan xalqının ümummilli lideri Heydər Əliyevin abidəsi önünə gül dəstələri qoymuşdur.
Nar bayramının açılış mərasimində Göyçay rayonu İcra hakimiyyətinin başçısı Mübariz Ağayev qədim Şirvan torpağında qonaqları salamlamışdır. Ulu öndər Heydər Əliyevin yürütdüyü siyasəti uğurla davam etdirən Prezident İlham Əliyevin regionların sosial-iqtisadi inkişafı ilə bağlı həyata keçirdiyi tədbirlərdən, qazanılmış uğurlardan söz açan M.Ağayev, avqustda Şəkidə keçirilən “İpək bayramı”ndan sonra belə bir tədbirin məhz Göyçayda keçirilməsinin region üçün böyük əhəmiyyət daşıdığını vurğulamış, dünyanın doqquzuncu möcüzəsi adlandırılan narın əvəzsiz nemət olduğunu, hazırda Göyçay əhalisinin gəlirlərinin təxminən 40 faizinin bu sərvətdən qazanıldığını bildirmişdir. Qeyd edilmişdir ki, hazırda rayonda 3 min hektar nar bağları mövcuddur və hər il buradan 10 minlərlə ton məhsul yığılır. Göyçayda bir neçə məşhur nar sortları yetişdirilir.
Nazir Əbülfəs Qarayev müstəqil Azərbaycanın son illər əldə etdiyi uğurlardan, Azərbaycanda həyata keçirilən islahatlardan, bu cür bayramların insanların əhval-ruhiyyəsində yaratdığı xoş təsirdən, yerli məhsulların təbliği ilə iqtisadiyyatın inkişafına müsbət təsirindən danışmışdır. Nazir Göyçayda hər il bu bayramın keçirilməsinin ənənəyə çevrilməsinin vacibliyini qeyd edərək rayonda nar muzeyinin yaradılması təklifini də yüksək qiymətləndirmişdir.
Rəsmi açılışdan sonra Bakı şəhər sakini Azər Əhmədovla Göyçayın Potu kənd sakini Gülər Məmmədova yeni ailə qurmaları münasibətilə təbrik edilmiş, onlara qiymətli hədiyyə verilmişdir.
Heydər Əliyev seyrəngahında rəmzi olaraq nar ağacı əkilmişdir. Sonra tədbir Göyçay rayon uşaq-əyləncə mərkəzində davam etdirilmişdir. Burada qonaqlar çörək kəsmiş, milli geyimdə oğlan və qızların, folklor qrupunun çıxışlarını izləmişlər. Burada ən böyük nar sahibinə, giləsini yerə salmadan ən tez nar yeyənə, habelə ən sürətli nar şirəsi hazırlayana pul mükafatları verilmişdir. Qonaqlara müxtəlif xəstəliklərin müalicəsində nar və nar məhsullarının xeyri, insan orqanizminə müstəsna faydası barədə məlumat verilmişdir. Bayram iştirakçıları Göyçayın tarixini əks etdirən nadir eksponatlarla tanış olmuşlar.
Sonra Heydər Əliyev prospekti boyunca Göyçayın iri istehsal müəssisələrinin – “Göyçay konyak zavodu”, “Göyçay-Konserv”, “Göyçay-Süd” ASC-lərin və Göyçay qida məhsulları kombinatının istehsal etdiyi müxtəlif çeşidli nar məhsullarına baxış keçirilmişdir.
Mərasim iştirakçıları “Göyçay-Süd” ASC-nin nəzdində yaradılmış “Garnet” meyvə qarışığı müəssisəsinin açılışında iştirak etmişlər. Rayon İcra hakimiyyətinin başçısı Mübariz Ağayev, kənd təsərrüfatı naziri İsmət Abasov çıxış edərək dövlətimizin başçısı İlham Əliyevin aqrar sahənin inkişafı istiqamətində gördüyü işlərdən danışmışlar. Qeyd edilmişdir ki, cəmi 5 aya tikilən və bu gün istifadəyə verilən müəssisədə 150 nəfər üçün yeni iş yeri açılmışdır, burada gündə 500 ton məhsul hazırlanacaqdır. Bütün avadanlıq İtaliyadan gətirilmişdir. İstehsal olunan nar şirəsi xüsusi təmizləyici qurğularda ən yüksək keyfiyyətlə hazırlanır. MDB ölklərində oxşarı olmayan bu müəssisənin istehsal etdiyi yüksək keyfiyyətli məhsul Avropa bazarlarında böyük alıcılıq qabiliyyətinə malik olacaqdır.
Sonra rəmzi qırmızı lent kəsilmiş və qonaqlar müəssisənin istehsal prosesi ilə tanış olmuş, məhsulların keyfiyyətinə baxmışlar.
Heydər Əliyev seyrəngahında tanınmış incəsənət ustaları öz gözəl mahnıları ilə göyçaylılara və qonaqlara xoş bayram ovqatı bəxş etmişlər.
Nar bayramı atəşfəşanlıqla sona çatmışdır.
Bölmənin digər xəbərləri
