Günəş enerjisi ilk dəfə Aİ-də ən böyük elektrik enerjisi mənbəyinə çevrilib
Bakı, 10 iyul, AZƏRTAC
Günəş enerjisi ilk dəfə Aİ ölkələrində ən böyük elektrik enerjisi mənbəyinə çevrilib. İyun ayında bu mənbə Aİ-nin elektrik enerjisinin 22,1 faizini, nüvə stansiyaları - 21,8 faizini, külək enerjisi isə 15,8 faizini istehsal edib. İyun ayında Aİ-nin elektrik balansında kömürün payı tarixdə ən aşağı səviyyəyə - 6,1 faizə düşüb.
Günəş enerjisi nüvə və külək mənbələrini qabaqlayaraq ilk dəfə Avropa İttifaqında ən böyük elektrik enerjisi mənbəyinə çevrilib, - deyə “Reuters” agentliyi “Ember” analitik mərkəzinin məlumatlarına əsasən bildirir.
AZƏRTAC xarici mətbuata istinadla xəbər verir ki, iyun ayında rekord günəş aktivliyi və günəş elektrik stansiyalarının davamlı quraşdırılması sayəsində günəş panelləri cəmi 45,4 teravatt-saat (TV.s) elektrik enerjisi istehsal edib. Ən azından Aİ-nin 13 ölkəsi, o cümlədən Almaniya, İspaniya və Niderlandda günəş enerjisi istehsalının ən yüksək aylıq həcmi qeydə alınıb.
İyun ayında Aİ-nin kömürlə işləyən elektrik enerjisinin demək olar ki, 80 faizini birlikdə istehsal edən Almaniya və Polşa rekord dərəcədə aşağı aylıq hasilat əldə ediblər. Kömür Almaniyanın elektrik enerjisi istehsalının 12,4 faizini, Polşada isə 42,9 faizini təşkil edib.
İyun ayında rekord günəş və külək enerjisi istehsalına baxmayaraq, 2025-ci ilin birinci yarısında Aİ-nin qazıntı yanacaq istehlakı illik müqayisədə 13 faiz artıb. Bu, ilin əvvəlində zəif su və külək enerji hasilatını kompensasiya etmək üçün qazla işləyən elektrik enerjisi istehsalında 19 faizlik artımla bağlıdır.
“Günəş enerjisi, ona ən çox ehtiyac duyulduqda, məhz yay isti dalğaları və pik tələbat zamanı artır”, - deyə “Ember”in enerji üzrə analitiki Kris Rosslou qeyd edib. Avropa enerji şəbəkəsi üçün növbəti məsələ - günəşli olmayan saatlarda qazıntı yanacaqdan asılılığı azaltmaq üçün akkumulyator batareyalarında enerjini saxlama imkanlarını genişləndirməkdir, - deyə “Ember” analitikləri qeyd ediblər.
Azərbaycanda günəş elektrik stansiyaları fəal inkişaf edir. Onlardan ən böyüyü olan Qaradağ günəş elektrik stansiyası Ələt kəndi yaxınlığında yerləşir. O, 230 MVt gücündədir və 110 minə yaxın evi elektrik enerjisi ilə təmin edir. Bir sıra rayonlarda da günəş elektrik stansiyaları tikilir.
Bölmənin digər xəbərləri
