Gürcü politoloqlar: Ermənistan işğalçılıq siyasətindən və terroru dəstəkləməkdən əl çəkməlidir
Tbilisi, 4 may, AZƏRTAC
Ermənistan hakimiyyəti xarici qüvvələrin təsiri altından çıxmalı, xalqı müstəmləkəçilikdən azad etməli, ölkədə demokratik, müstəqil dövlət qurulmalıdır. Bunlar olarsa, Cənubi Qafqaz dünyanın ən sabit, çiçəklənən və inkişaf etmiş bölgəsinə çevriləcək.
AZƏRTAC xəbər verir ki, bu fikirləri gürcü politoloqlar Ermənistanda yaranmış son vəziyyəti şərh edərkən söyləyiblər.
“Art Qalleri” televiziyasının direktoru, politoloq Tengiz Txilava hesab edir ki, Ermənistan, ilk növbədə, işğalçılıq siyasətinə son qoymalı, qonşularla normal münasibətlər qurmalıdır. Ermənistan Dağlıq Qarabağı işğaldan azad etməyincə, terroru dəstəkləməkdən əl çəkməyincə hər hansı demokratik quruluşdan danışmağa dəyməz. Bu gün Ermənistanda baş verənlər sağlam inqilabi hərəkat deyil, iki və daha çox iddialı qruplaşmanın hakimiyyət uğrunda mübarizəsidir. Hakimiyyət uğrunda mübarizədə dinc, günahsız insanlar əziyyət çəkirlər. Ona görə də hesab edirəm ki, Ermənistandakı qüvvələr hamısı siyasətdən getməli, yeni şüur formalaşmalı, demokratik, müstəqil dövlət qurulmalıdır.
Tarixçi alim, politoloq Simon Kopadze deyib ki, Ermənistanda baş verən hakimiyyət dəyişikliyi çoxdan hazırlanan prosesdir. Lakin bu dəyişiklik bizə yaxşı heç nə vəd etmir. Hakimiyyət uğrunda mübarizədə keçmiş prezident Serj Sarkisyanı hakimiyyətdən uzaqlaşdıran Nikol Paşinyan son bəyanatları ilə sübut etdi ki, Ermənistan öz çirkin siyasətindən əl çəkməyəcək. Paşinyan bəyan edir ki, Ermənistanın xarici siyasətində heç bir dəyişiklik olmayacaq. Deməli? Ermənistan bundan sonra da qonşularına qarşı təcavüzkar siyasətini və terroru dəstəkləməyi davam etdirəcək. Ona görə də hesab edirəm ki, Ermənistanda baş verən inqilab və hakimiyyət dəyişikliyi nə erməni xalqına, nə də region dövlətlərinə yaxşı heç nə vəd etmir. “Erməni xalqının və hakimiyyətdə olanların siyasi baxışları dəyişməlidir. İlk növbədə, Ermənistanda müstəqil dövlət qurulmalıdır. Müstəqil olmayan dövlətin müstəqil siyasəti də olmaz”, - deyə S.Kopadze vurğulayıb.
Gürcüstanda Terrorizm və Siyasi Araşdırmalar Mərkəzinin direktoru, politoloq Badri Natçkebiya isə deyib ki, müstəqil olmayan, xarici güclərin diktəsi ilə regionda sabitliyi pozmağa çalışan bir dövlətdə kimin hakimiyyətə gəlməsi yaxşı heç nə vəd etmir. Əgər Paşinyan hakimiyyətə gələrsə, biz çox yaxın bir vaxtdan sonra onun da Serj Sarkisyandan fərqli olmadığının şahidi olacağıq. Yəni, bir korrupsioner hakimiyyət digəri ilə əvəzlənəcək. Ermənistanda hakimiyyətə sağlam düşüncəli qüvvələr gəlməlidir və onlar həm ölkənin daxili, həm də xarici siyasətini kökündən dəyişməlidir.
Politoloqların fikrincə, Ermənistanda bir və ya bir neçə şəxsin hakimiyyətdən getməsi nə bu ölkə, nə də region üçün yaxşı heç nə vəd etmir. Paşinyanın Sarkisyanla əvəzləməsi, nəticə etibarilə, heç nə verməyəcək.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
