GÜRCÜSTAN AZƏRBAYCANIN KÖMƏYİ İLƏ ENERJİ BÖHRANINDAN ÇIXIR
“Tbilqaz” şirkətinin məlumatına görə, Azərbaycan Gürcüstanın xahişinə müsbət cavab vermiş və yanvarın 23-də səhər 3 milyon kubmetr qaz Gürcüstan ərazisinə daxil olmuşdur. İlk növbədə həmin qaz hazırda 20 dərəcədən yuxarı şaxta olan Müqəddəs Stepan (keçmiş Kazbeqi) və Duşeti rayonlarına verilmiş, günün sonunadək isə Tbilisi şəhərinin qaz təminatı bərpa edilmişdir.
Prezident Mixail Saakaşvili qaz kəmərinin və yüksək gərginlikli elektrik xəttinin partladılmasını əvvəlcədən planlaşdırılmış təxribat adlandırmış və demişdir ki, “heç kəs bu yolla Gürcüstanı diz çökdürə bilməyəcəkdir”.
Bir sıra siyasətçilər isə bunun Gürcüstan parlamentinin Rusiya sülhməramlılarının Cənubi Osetiya və Abxaziya münaqişələri bölgələrindən çıxarılmasına dair qərarına cavab olaraq edildiyini, Rusiyanın etibarsız tərəfdaş olduğunu bildirmiş və Gürcüstanın Rusiyadan enerji asılılığını aradan qaldırmaq üçün alternativ yollar axtarılmasının vacibliyini vurğulamışlar.
Gürcüstan parlamenti yanvarın 23-də keçirilən büro iclasında hadisəyə siyasi qiymət vermişdir.
Beləliklə, şaxtalı qış günlərində Gürcüstan Azərbaycanın sayəsində enerji böhranından xilas ola bilmişdir.
Bölmənin digər xəbərləri
