GÜRCÜSTAN PREZİDENTİ AZƏRBAYCANLILARI NOVRUZ BAYRAMI MÜNASİBƏTİLƏ TƏBRİK ETMİŞDİR
AZƏRTAC-ın xüsusi müxbiri xəbər verir ki, Gürcüstan Prezidenti Mixail Saakaşvili martın 21-də Kvemo Kartli-Borçalı bölgəsinin Marneuli rayon mərkəzində keçirilən Novruz şənliklərində iştirak etmiş, Bahar bayramı münasibətilə azərbaycanlıları təbrik etmişdir. M.Saakaşvili Gürcüstan-Azərbaycan münasibətlərinin inkişafından, Azərbaycan Prezidenti İlham Əliyevlə dostluq, qardaşlıq münasibətlərindən, qanunatabe, yurdsevər, əməksevər Gürcüstan azərbaycanlılarının hüquqi dövlət quruculuğunda səmərəli fəaliyyətindən, onların gürcü dilini öyrənmək istəyindən, gürcü cəmiyyətinə inteqrasiyasından söhbət açmışdır. M.Saakaşvili bu qış Gürcüstanda yaranmış enerji böhranı zamanı göstərdiyi qardaşlıq yardımına görə, Prezident İlham Əliyevə və Azərbaycan xalqına bir daha dərin minnətdarlığını bildirmişdir.
M.Saakaşvili yerli əhali ilə görüşmüş, onların problemləri ilə maraqlanmış, bu ildən rayonda yolların bərpasına başlanacağını bildirmiş, rayon mərkəzində yeni idman salonunun və imkansızlar üçün pulsuz yeməkxananın açılışında iştirak etmişdir.
Bölmənin digər xəbərləri
